MDB

Danışıqlar bir neçə kvadrat kilometr ərazi üzərində gedir - Vens şad xəbəri elan etdi

8 Aprel 2026 17:27

ABŞ-ın vitse-prezidenti Cey Di Vens Ukraynadakı münaqişənin həlli ilə bağlı davam edən danışıqların kritik mərhələdə olduğunu açıqlayıb. O, tərəflərin mövqelərinin maksimal dərəcədə yaxınlaşdığını bildirib.

Publika.az xəbər verir ki, vitse-prezident hazırda müzakirələrin cəmi bir neçə kvadrat kilometr ərazi ətrafında getdiyini vurğulayıb.

“Müəyyən irəliləyişə nail olmuşuq. Əlbəttə, hələ yekun nəticə yoxdur, lakin kifayət qədər nikbinəm. Hazırda tərəflər bu və ya digər istiqamətdə konkret ərazilər üzərində mübahisə edirlər”, - deyə Vens qeyd edib.

O, söhbətin hansı konkret ərazilərdən getdiyini bildirməsə də, həm Rusiya, həm də Ukrayna tərəfinin təqdim etdiyi sənədlərlə tanış olduqlarını diqqətə çatdırıb. ABŞ rəsmisinin sözlərinə görə, tərəflərin sülh şərtləri zaman keçdikcə bir-birinə daha da yaxınlaşır.

Vens yekun sazişin dəqiq vaxtı barədə proqnoz verməkdən yayınıb, lakin prosesin müsbət məcrada irəlilədiyini xüsusi vurğulayıb.

Müəllif: Adəm