Ukraynalı konsulun "rus sevgisi" baha başa gəldi - Səfir cəzalandırıldı

Ukrayna Xarici İşlər Nazirliyi ictimaiyyətin kəskin etirazından sonra keçmiş model Viktoriya Yakimovanın Dominikan Respublikasındakı fəxri konsul patentini geri çağırıb. Buna səbəb xanım konsulun keçmişdə çəkdirdiyi açıq-saçıq fotolar və Rusiyanın milli baş geyimi olan "kokoşnik"də verdiyi pozalar olub.

Publika.az "Ukrayinska Pravda"ya istinadən xəbər verir ki, nazirlik eyni zamanda V.Yakimovanın namizədliyini irəli sürən Ukraynanın Kubadakı səfirini də geri çağırıb.

Məsələ ilə bağlı açıqlama verən XİN qeyd edib ki, fəxri konsullar diplomatik xidmət orqanlarının ştatlı əməkdaşları sayılmırlar, dövlətdən maaş almırlar və Ukraynanın siyasi təmsilçiliyi funksiyasını daşımırlar.

Nazirlikdən bildirilib ki, seçimlər zamanı müvafiq yoxlamalar aparılsa da, ilkin mərhələdə onun Rusiya ilə əlaqələri və ictimai fəaliyyətinə dair heç bir etiraz qeydə alınmayıb. Lakin yaranmış böyük ictimai rezonans və əlavə araşdırmalardan sonra bu təyinatın ləğv edilməsi məqsədəuyğun sayılıb.

Müəllif: Adəm