Dağıstanda fövqəladə vəziyyət rejimi gücləndiriləcək

Rusiyanın fövqəladə hallar naziri Aleksandr Kurenkov daşqınlardan zərər çəkmiş Dağıstanda və Çeçenistanda federal səviyyəli reaksiya rejiminin tətbiq edilməsini təklif edib.

Publika.az xəbər verir ki, o, iki regiondakı vəziyyətin federal xarakterli fövqəladə vəziyyət kimi qiymətləndirilməsi təşəbbüsü ilə çıxış edib.

Onun fikrincə, hər iki respublika rəhbərliyi yaşayış evlərinin və sosial əhəmiyyətli obyektlərin bərpası planlarının hazırlanmasını təşkil etməlidir.

Martın 28-də və aprelin 4-5-də yağan güclü yağışlar Dağıstanda genişmiqyaslı daşqınlara səbəb olub. Mahaçqala, Xasavyurt, Buynaksk, Dağıstan Oqniləri, Kaspiysk şəhərlərində, eləcə də respublikanın bir sıra rayonlarında fövqəladə vəziyyət rejimi tətbiq edilib.

Su səviyyəsinin qalxması Dərbənd rayonu ərazisində federal avtomobil yolunun su altında qalmasına səbəb olub, Qedjux su anbarındakı bəndin dağılması isə 4 mindən çox insanın təxliyəsinə gətirib çıxarıb. Son məlumatlara görə, altı nəfər həlak olub, 6,2 mindən çox insan zərər çəkib.

Hazırda səkkiz yaşayış məntəqəsində 1091 yaşayış evi, 1146 həyətyanı sahə və 70 yol sahəsi su altında qalır.