Gözlənilməz gediş: Putin və Zelenski razılaşdı?

Rusiya və Ukrayna arasında davam edən müharibədə gözlənilməz "Pasxa atəşkəsi" gündəmə gəlib. Rusiya Prezidentinin mətbuat katibi Dmitri Peskov Ukrayna tərəfinin bu təşəbbüsə müsbət yanaşdığını açıqlayıb.

Publika.az xəbər verir ki, bu barədə Peskov jurnalistlərə açıqlamasında bildirib.

Onun sözlərinə görə, Kreml Ukrayna lideri Vladimir Zelenskinin Rusiyanın nümunəsini izləməyə və Pasxa bayramı zamanı "sükut rejimi"nə əməl etməyə hazır olduğu barədə bəyanatını qeydə alıb.

"Dünən gecə saatlarda ali baş komandanın şənbə günü saat 16:00-dan bazar günü axşamədək atəşkəs elan edilməsi barədə əmri yayıldı. Bu, Pasxa atəşkəsidir. Biz həmçinin Zelenskinin Ukrayna tərəfinin bu nümunəyə tabe olacağı barədə bəyanatını da gördük" - deyə Peskov qeyd edib.

Xatırladaq ki, Rusiya prezidenti Vladimir Putin aprelin 11-i saat 16:00-dan aprelin 12-si gecə yarısına qədər hərbi əməliyyatların dayandırılması barədə göstəriş verib. Zelenski isə bu təşəbbüsü şərh edərək müvafiq şəkildə hərəkət edəcəklərinə söz verib.

Müəllif: Adəm