Hava limanında DƏHŞƏTLİ ANLAR - İldırım təyyarədə altı dəlik açdı

Soçi rayonunda dörd sərnişin təyyarəsini ildırım vurub.

Publika.az xəbər verir ki, bu barədə "Aviatorşina" "Telegram" kanalı məlumat yayıb.

Qeyd olunub ki, hadisədən ilk olaraq Permdən uçan təyyarə zərər çəkib. Aprelin 15-i səhər saat 7:00 radələrində ildırım laynerə dəyərək onda altı dəlik açıb və burun hissəsində izlər qoyub. Hava gəmisinin komandiri enişi davam etdirmək və Soçi hava limanına enmək qərarına gəlib.

Bir saatdan bir qədər çox vaxt keçdikdən sonra ildırım eyni anda iki təyyarəni vurub; həmin vaxt onlardan biri enişə hazırlaşır, digəri isə havaya qalxırmış. Şeremetyevodan SU-1110 reysini həyata keçirən Airbus A320 (RA-73172) heyəti 1830 metr hündürlükdə təyyarəyə ildırım dəydiyi barədə məlumat verib.

Təxminən eyni vaxtda, elə həmin hündürlükdə, lakin Soçidən havaya qalxdıqdan sonra Çelyabinskə DP-323 reysini yerinə yetirən Boeing 738 (RA-73244) təyyarəsini də elektrik boşalması vurub. Komandir bu barədə dispetçerlərə məlumat verib və təyinat hava limanına qədər uçmağa qərar verib. Balandino hava limanında təyyarəyə baxış keçirilərkən xarakterik zədələr — antena örtüyündəki metal boşaldıcının zərər gördüyü aşkar edilib.

Bundan əlavə, Özbəkistanın milli daşıyıcısı "Uzbekistan Airways"ə məxsus olan və Daşkənddən HY-685 reysi ilə gələn Airbus A320 (UK-32018) təyyarəsi də ildırımın hədəfi olub. Heyət saat doqquzun yarısında enişdən sonra, 762 metr hündürlükdə ildırım vurması barədə məruzə edib. Bütün hallarda təyyarələr ştat rejimində uğurlu eniş edib, xəsarət alan olmayıb.

Hüseyn İbadlı