Kadırov "ölüm fədailəri"ni meydana çıxardı: Oğlu Adam kamikadzelərin əhatəsində - VİDEO

Çeçenistan rəhbəri Ramzan Kadırov sosial şəbəkə hesabında hər kəsin diqqətini çəkən növbəti səs-küylü video paylaşıb. O, bu dəfə oğlu Adamı zabit formasında və "əsl ölüm fədailəri" (kamikadze) adlandırdığı xüsusi təyinatlıların əhatəsində nümayiş etdirib.

Publika.az xəbər verir ki, "Telegram" kanalında paylaşılan görüntülərdə Türkiyə istehsalı olan "Kirpi" zirehli maşınlarının və üzərində sayrışan işıqlar olan avtomobillərin fonunda xüsusi təyinatlı dəstənin düzülüşü əks olunub. Maraqlıdır ki, bütün xidməti avtomobillərin dövlət nömrə nişanlarında Adam Kadırovun sevimli rəqəmi olan "13" rəqəmi əksini tapıb.

Videoda Adam Kadırov atasına zirehli texnikanın daxili quruluşu ilə bağlı "ekskursiya" keçib və müxtəlif şüarlar səsləndirib. Ramzan Kadırov isə tabeliyindəki döyüşçüləri bu sözlərlə vəsf edib: "Şəxsi heyətin döyüş ruhu yüksək səviyyədədir. Bunlar əsl ölüm fədailəridir. Tapşırığı yerinə yetirmək üçün canlarından keçməyə hazır olan, riski işinin bir hissəsi kimi qəbul edən insanlardır".

Kadırovun "özəl qüvvələri" kimi təqdim olunan bu bölmənin rəsmi adı açıqlanmayıb.

Müəllif: Adəm