Ukrayna dronları Moskva üzərində: Rusiyadan "hamısını vurmaq olmur" etirafı

Rusiya Müdafiə Nazirliyi Ukrayna tərəfindən həyata keçirilən kütləvi pilotsuz uçuş aparatı (PUA) hücumu barədə rəsmi məlumat yayıb.

Publika.az xəbər verir ki, nazirliyin açıqlamasına görə, mayın 4-ü saat 20:00-dan mayın 5-i saat 07:00-a qədər davam edən hava hücumu zamanı Rusiyanın hava hücumundan müdafiə sistemləri tərəfindən 289 Ukrayna dronu məhv edilib.

PUA-lar Rusiyanın 18 müxtəlif ərazilərində, o cümlədən Bryansk, Belqorod, Voronej, Kursk, Kaluqa və Smolensk vilayətləri üzərində zərərsizləşdirilib. Həmçinin Oryol, Tver, Tula, Ryazan, Pskov, Novqorod, Leninqrad, Rostov, Volqoqrad vilayətləri, Krasnodar diyarı və Tatarıstan üzərində də döyüş əməliyyatları aparılıb. Ukrayna dronlarının Moskvaya qədər çatdığı bildirilir.

Bundan əlavə, Azov dənizi akvatoriyasında da dronların vurulduğu qeyd olunub. Lakin nazirlik hücumun çox genişmiqyaslı olduğunu və bütün hədəflərin qarşısının alınmasının mümkün olmadığını etiraf edib.

Məlumata görə, hücumlar nəticəsində Çeboksarı şəhəri və Bryansk vilayətində xəsarət alanlar var.

Müəllif: Adəm