Rusiya “Telegram”ı növbəti dəfə cərimələdi: Milyonlar ödəməli olacaq

Moskvanın Taqan şəhər məhkəməsi Rusiyada qadağan olunmuş məlumatları silməkdən imtina etdiyi üçün “Telegram” messencerini 3,8 milyon rubl (təxminən 70 min manatdan çox) məbləğində cərimələyib.

Publika.az xəbər verir ki, bu barədə məlumatı TASS məhkəmənin mətbuat xidmətinə istinadən yayıb.

Məhkəmənin qərarına əsasən, “Telegram Messenger Inc.” Rusiya Federasiyasının İnzibati Xətalar Məcəlləsinin informasiyaya çıxışın məhdudlaşdırılması qaydasının pozulması maddəsi ilə təqsirli bilinib.

Xatırladaq ki, bu, messencerin üzləşdiyi ilk maliyyə sanksiyası deyil. Mayın 5-də şirkət analoji səbəbdən 7 milyon rubl məbləğində cərimələnmişdi. Aprel ayının sonunda da platformaya qarşı eyni məbləğdə cərimə tətbiq olunmuşdu.

Bu ilin mart ayına olan məlumatlara görə, “Telegram”ın qanun pozuntularına görə ödənilməmiş cərimə borcları artıq 35,9 milyon rubla (təxminən 665 min manat) çatıb.

Bundan əlavə, son dövrlər platformanın Rusiyada milyonlarla istifadəçi itirdiyi barədə məlumatlar da yayılmaqdadır.

Müəllif: Adəm