Fyodorov dolların ucuzlaşmasının səbəbini açıqladı

"Rublun möhkəm qalması ölkədə xarici valyuta təklifinin artması və eyni zamanda ona olan tələbin azalması ilə bağlıdır".

Publika.az xəbər verir ki, bunu Rusiyanın BKS Dünya İnvestisiyaları şirkətinin baş iqtisadçısı İlya Fyodorov Qazeta.Ru nəşrinə müsahibəsində bildirib.

Ekspertin fikrincə, təkcə neftin deyil, həm də ərzaq, gübrə və metalların ixrac qiymətləri yüksəlib. Bu məhsullardan əldə olunan ixrac gəlirləri valyuta bazarında satılır və hazırda təklif olduqca yüksəkdir. Digər tərəfdən, Fars körfəzi vasitəsilə həyata keçirilən idxalın dayanması və ya kəskin azalması valyutaya olan tələbi aşağı salıb.

İqtisadçı izah edib ki, məhz bu amillərin birləşməsi rublun məzənnəsini güclü səviyyədə saxlayır. Maliyyə Nazirliyi tərəfindən həyata keçirilən valyuta alışlarının həcminin az olması da əlavə faktor rolunu oynayıb. Fyodorov qeyd edib ki, bazar iştirakçıları büdcə qaydasının məzənnəyə daha ciddi təsir edəcəyini gözləsələr də, faktiki alış həcmləri proqnozlaşdırılandan xeyli aşağı olub.

Onun sözlərinə görə, nazirliyin valyuta alışları rublun möhkəmlənmə sürətini sadəcə zəiflədib, lakin gözlənildiyi kimi onun ucuzlaşmasına səbəb olmayıb.

İqtisadçı ehtimal edir ki, iyun ayında valyuta alışları təxminən 270 milyard rubl təşkil edə bilər.

Fyodorovun qənaətinə görə, bu həcm iyunun əvvəlində məzənnənin bir dollar üçün 78-80 rubl diapazonuna doğru dəyişməsi üçün kifayətdir.

Hüseyn İbadlı