Rusların "Buxanka"sında ABŞ-ın gizli silahı tapıldı: Süni intellektlə işləyir

ABŞ istehsalı olan “Hornet” kamikadze pilotsuz uçuş aparatı Rusiyanın məşhur “Buxanka” kimi tanınan UAZ SGR avtomobilinin damında görüntülənib.

Publika.az xəbər verir ki, bununla bağlı məlumatı "Military Informant" "Telegram" kanalı yayıb.

Kadrlardan görünür ki, avtomobil maskalanma toru ilə örtülüb və Rusiya hərbçiləri tərəfindən istifadə olunur. İddialara görə, dron cəbhə xəttində Ukrayna mövqelərindən qənimət kimi ələ keçirilib.

“Hornet” pilotsuz aparatı Ukrayna Silahlı Qüvvələri tərəfindən əsasən Rusiya ordusunun logistikasına qarşı istifadə olunur. Dron süni intellekt elementləri və “Starlink” terminalları ilə təchiz edildiyindən operatorla daimi əlaqə olmadan avtonom fəaliyyət göstərə bilir.

Məlumata görə, bu aparat xüsusilə cəbhə bölgəsində və dərin arxa cəbhədə hərbi texnikaların, o cümlədən təchizat üçün istifadə olunan “Buxanka” tipli avtomobillərin məhv edilməsi məqsədilə hazırlanıb.

“Hornet”in ən təhlükəli xüsusiyyətlərindən biri onun yüksək avtonomluğa malik olmasıdır. Belə ki, pilotsuz aparat radioelektron mübarizə vasitələrinin yaratdığı maneələrə qarşı davamlı hesab olunur və daimi pilot idarəetməsinə ehtiyac duymur.

Müəllif: Adəm