İqtisadi inteqrasiya məhdudlaşdırıla bilər - Putindən Ermənistana xəbərdarlıq

Əgər İrəvan Avropa İttifaqına üzvlük istiqamətində fəaliyyətini davam etdirmək qərarı qəbul edərsə, Moskva Ermənistanla iqtisadi inteqrasiya sahəsində işi faktiki olaraq dayandıra bilər.

Publika.az xəbər verir ki, bunu Rusiya Prezidenti Vladimir Putin Astanada keçirilən Ali Avrasiya İqtisadi Şurasının iclasının yekunlarına dair mətbuat konfransında deyib.

“Bəzi mexanizmləri uyğunlaşdırmaq mümkündür, bəzilərini isə yox. Bu gün bir-biri ilə müqayisə olunmayan çox şey var. Onlar birlikdə mövcud ola bilməz”, - deyə Rusiya Prezidenti bildirib.

O qeyd edib ki, Avropa standartlarına keçid üçün böyük həcmdə investisiyalar və vaxt tələb olunur: “Məsələn, Avropada mövcud olan və yəqin ki, bizimkindən daha inkişaf etmiş bəzi standartları təmin etmək üçün həmin məhsullar üzrə istehsal yaratmağa vəsait yatırmalıyıq. Eyni vəziyyət əks istiqamətdə də keçərlidir. Buna görə də bu gün və ya sabah birini digəri ilə birləşdirmək praktiki olaraq mümkün deyil”.

Rusiya liderinin sözlərinə görə, məhz buna görə də Rusiya inteqrasiya xarakterli iqtisadi əməkdaşlığı məhdudlaşdırmağa məcbur qala bilər: “Buna görə də biz bu halda iqtisadiyyat sahəsində inteqrasiya prosesləri ilə bağlı fəaliyyətimizin, demək olar ki, tamamilə dayandırılmasına məcbur olacağıq”.