Ukrayna son sutkada 1400-ə yaxın hərbçi itirib? - Şok iddia

Ukrayna Silahlı Qüvvələrinin son sutka ərzində müvafiq döyüş zonalarında ümumi itkiləri 1 385-dək hərbçi təşkil edib.

Publika.az xəbər verir ki, bu barədə Rusiya Müdafiə Nazirliyi məlumat yayıb.

Rəsmi hesabata görə, Ukrayna ordusu "Şimal" qruplaşmasının məsuliyyət zonasında 185-dək, "Qərb" qruplaşmasının zonasında isə 200-dən çox hərbçi itirib. "Cənub" və "Mərkəz" qruplaşmalarının əməliyyatları nəticəsində qarşı tərəfin itkiləri müvafiq olaraq 165-dən və 340-dək hərbçidən çox olub. Bundan əlavə, Ukrayna qoşunları "Şərq" qruplaşmasının zonasında 445-dən çox, "Dnepr" qruplaşmasının məsuliyyət zonasında isə 50-dən çox əsgər itirib.

Nazirlik həmçinin qeyd edib ki, mayın 30-da Ukrayna tərəfi pilotsuz uçuş aparatı (PUA) vasitəsilə Zaporojye Atom Elektrik Stansiyasının (AES) altı nömrəli enerji blokunun şimal tərəfinə zərbə endirib.

Hücum nəticəsində reaktor bölməsindən 10 metr məsafədə yerləşən maşın zalının fasadına ziyan dəyib. Hadisə zamanı xəsarət alan olmayıb və AES hazırda ştat rejimində fəaliyyətini davam etdirir.