Ukrayna hər yeri mühasirəyə alıb: Krımda böhran yaşanır, Rusiya əlacsızdır

Ukraynanın Krım körpüsünə hücumları işğal olunmuş Donetsk, Zaporojye və Xersondan keçən marşrutu Rusiyanın yarımadaya aparan əsas logistika dəhlizinə çevirib.

Publika.az “Milliyet”ə istinadla xəbər verir ki, Rusiya qüvvələri quru yoluna nəzarət etsələr də, bu xətt Ukraynanın dron hücumları nəticəsində faktiki olaraq istifadəyə yararsız hala düşüb. 24 maydan bəri Ukrayna R-200 magistral yolunu 30-200 km mənzilli taktiki dron bölmələri ilə blokadaya alıb.

Bu dron bölmələri Rostovdan Krıma gedən yol boyunca yanacaq tankerlərini və zirehli texnikaları hədəfə alıb. Hücumlar nəticəsində Krıma yanacaq tankerlərinin çatdırılmaması bölgədə yanacaq böhranına səbəb olub.

Yanacaqdoldurma məntəqələrinin üçdə biri bağlanıb və hər nəqliyyat vasitəsi üçün 20 litr yanacaq limiti tətbiq edilib. Son on gündə supermarket rəfləri də xeyli boşalıb.

Bildirilir ki, məhsul yığımı mövsümü ərəfəsində dərinləşən böhran cənub bölgələrində kənd təsərrüfatı istehsalına da mənfi təsir göstərəcək.

Müəllif: Tural