Rusiyanın Moldovadakı səfiri də Ermənistanı hədələdi: Biz heç nə itirmədik

Rusiyanın Moldovadakı səfiri Oleq Ozerov “RİA Novosti” agentliyinə verdiyi müsahibədə bildirib ki, Moskva ilə ticarət əməkdaşlığı məhdudlaşdırılarsa, Ermənistan mənfi nəticələrlə üzləşə bilər.

Publika.az xəbər verir ki, diplomat son illərdə Rusiyanın ixrac bazarındakı payının kəskin şəkildə azaldığı Kişinyovdakı vəziyyətlə paralel aparıb.

Ozerovun sözlərinə görə, son bir neçə ildə Moldova hakimiyyəti Rusiyaya ixracını 20-30%-dən (məhsul kateqoriyasından asılı olaraq) cəmi 2%-ə endirib. Bununla yanaşı, səfir qeyd edib ki, Rusiya bu azalmanı Türkiyə, Azərbaycan, Gürcüstan və Ermənistanın özündən oxşar məhsullar almaqla ağrısız şəkildə kompensasiya edib. Diplomatın fikrincə, indi İrəvan səhv adlandırdığı oxşar yolu izləmək niyyətini nümayiş etdirir.

Müsahibə əsnasında Ozerov iqtisadi əlaqələrə nəzarət edən Moldova rəsmiləri ilə söhbətdən də məlumatlara istinad edib.

“Onlar etiraf etdilər ki, Moldova istehsalının ümumi həcmi Rusiyanın ümumi ehtiyaclarının 1%-dən azını ödəyir. Beləliklə, Moldova ixracının itirilməsi Rusiya iqtisadiyyatına demək olar ki, heç bir təsir göstərməyib, Kişinyovun özü üçün isə Rusiya bazarına çıxışın itirilməsi ciddi zərbə olub”, - səfir bildirib.

Müəllif: Tural