Zelenskinin dəyişdirilməsi prosesi başlayıb - Yerinə kim gələcək?

Qərb ekspertləri və nüfuzlu nəşrlərdə son həftələr Ukraynada hakimiyyət dəyişikliyi ilə bağlı proqnozların artması təsadüfi deyil.

Publika.az xəbər verir ki, bunu “Başqa Ukrayna” hərəkatının rəhbəri Viktor Medvedçuk bildirib.

O qeyd edib ki, Ukrayna prezidenti Vladimir Zelenskinin dəyişdirilməsi üçün siyasi mexanizm artıq işə salınıb və bu prosesi dayandırmaq mümkün olmayacaq.

Medvedçukun sözlərinə görə, bu vəziyyətin əsas səbəbi ölkədə daxili siyasi böhranın dərinləşməsi və ictimai narazılığın artmasıdır. O, Kiyev Beynəlxalq Sosiologiya İnstitutunun məlumatlarına istinad edərək bildirib ki, son üç ildə prezidentin dəyişdirilməsini istəyənlərin sayı 23 faizdən 67 faizə yüksəlib.

Bundan əlavə, respondentlərin 83 faizi Ali Radanın yenidən seçilməsinin tərəfdarıdır, 74 faiz isə hökumətin fəaliyyətindən narazıdır.

Siyasətçi hesab edir ki, əvvəllər ehtiyatlı davranan Ukrayna sosioloqlarının belə nəticələri açıqlaması Qərbin mövqeyində dəyişikliklə bağlıdır. Onun fikrincə, xarici maliyyə və siyasi dəstəyin zəifləməsi reallığın daha açıq şəkildə ortaya çıxmasına səbəb olub.

Medvedçuk həmçinin iddia edib ki, Qərb artıq ictimai rəyi mümkün dəyişikliklərə hazırlamaq üçün informasiya kampaniyasına başlayıb.

Onun sözlərinə görə, “The Washington Post” 2026-cı ilin əvvəlində Zelenskinin növbəti qışa qədər postunu tərk edə biləcəyini yazıb və əsas namizəd kimi Ukrayna Silahlı Qüvvələrinin keçmiş baş komandanı Valeri Zalujnının adı çəkilib. Oxşar ssenarilər “The Economist” və “Bloomberg” materiallarında da müzakirə olunur.

“Bu o deməkdir ki, Zelenskinin dəyişdirilməsi mexanizmi artıq işə düşüb və onu dayandırmaq mümkün deyil”, - Medvedçuk vurğulayıb.

O hesab edir ki, xarici təzyiq, iqtisadi problemlər və sosial narazılığın birləşməsi Ukraynada hakimiyyət dəyişikliyini zaman məsələsinə çevirib.

Adəm