Neft anbarı, elektrik stansiyası, liman... - Ukrayna dronları hər yeri vurur

23 iyun gecəsi Ukrayna dronları ilhaq edilmiş Krımdakı hədəflərə kütləvi hücum təşkil edib.

Publika.az xəbər verir ki, Ukraynanın monitorinq resursu “Supernova”-nın məlumatına görə, Sovetski rayonundakı böyük “Nasosnaya-2” elektrik yarımstansiyası vurulub. NASA FIRMS peyk görüntülərinə görə, obyektdə yanğın baş verib.

"Krımskiy veter” kanalının abunəçiləri saat 2:00 radələrində Sovetski rayonunda "güclü partlayış" baş verdiyini bildiriblər. Kanal həmçinin Nikolaevka kəndinin şimalındakı nasos stansiyasına enerji verən 220/35 kV-luq NS-2 yarımstansiyasının yaxınlığında yanğın baş verdiyini bildirib.

Zərbə nəticəsində səhər saatlarından etibarən Yevpatoriya, Krasnoperekopski, Sakski, Cankoyski və Krasnoqvardeyski rayonlarında elektrik kəsintiləri müşahidə olunub.

Bundan əlavə, kanalın məlumatına görə, 21 iyun hücumundan sonra hələ söndürülməmiş Kerç dəniz limanındakı neft anbarı və Kubandakı “Qafqaz” limanındakı neft terminalı bir həftə ərzində ikinci dəfə zərər çəkib. Orada yanğınlar baş verib. Kerçdə neft məhsullarının və maye qazın saxlanması və yüklənməsi üçün nəzərdə tutulmuş böyük liman logistika obyekti olan TES-Terminal neft məhsullarının daşınması və saxlanması kompleksi də zərər görüb. Kerçin Arşintsevo rayonundakı istilik elektrik stansiyasında da böyük yanğın baş verib. Yanacaq yağı saxlama çəninə ziyan dəyib. Yanan konteynerdən çıxan tüstü təxminən 50 kilometrə qədər uzanıb.

Yanğınlar Kerçin girişində və şəhərdən 15 km aralıda, Rusiyanın S-300/S-400 hava hücumundan müdafiə sistemlərinin yerləşdiyi Baqerovo kəndi yaxınlığında da qeydə alınıb. Kerçdəki Yujnaya dəmir yolu stansiyasında da yanğın baş verib. Kerç körpüsündə nəqliyyatın hərəkəti səhər saat 7:00 radələrində dayandırılıb. Simferopolda "Dobrotsen" pərakəndə satış şəbəkəsinin anbarlarının yaxınlığındakı mağazalar və emalatxanalar yanıb.

Müəllif: Tural