Moskva qərarını verdi: Bundan sonra hər şeyi cəbhə həll edəcək

Almaniyanın “Berliner Zeitung” nəşri Ukrayna münaqişəsinin “Alyaska razılaşmaları” əsasında nizamlanması cəhdlərinin uğursuzluğa düçar olduğunu yazıb.

Publika.az xəbər verir ki, analitik materialda qeyd olunur ki, Vaşinqtonun Ankoricdə üzərinə götürdüyü öhdəlikləri yerinə yetirməməsi Moskvanın yanaşmasına təsir göstərib.

Məqalədə bildirilib ki, Rusiya tərəfi ABŞ administrasiyasının əldə olunmuş anlaşmalara əməl edə bilmədiyini hesab edir və buna cavab olaraq hərbi fəaliyyətin intensivləşdirilməsini gündəmə gətirir. Bununla yanaşı, Moskvanın diplomatik həll variantına hazır olduğunu bəyan etdiyi vurğulanır.

Rusiya prezidentinin köməkçisi Yuri Uşakovun sözlərinə istinadən qeyd edilir:

“Biz bu anlaşmaların və ya razılaşmaların yerinə yetirilməsini gözləmirik. Biz qələbə və öz məqsədlərimizin reallaşmasını gözləyirik”.

Nəşr yazıb ki, ötən ilin avqustunda Ankoricdə keçirilən Putin-Tramp görüşündən sonra Vaşinqtonla Moskva arasında başlayan ehtiyatlı yaxınlaşma prosesinin artıq dayanması ehtimalı güclənib.

Analitiklər hesab edirlər ki, ABŞ tərəfinin razılaşmaların şərtlərinə sistemli şəkildə əməl etməməsi Rusiyanı prioritetləri daha çox hərbi həll istiqamətinə yönəltməyə vadar edir.

Məqalədə qeyd olunub ki, son aylarda yüksək vəzifəli Rusiya rəsmiləri Vaşinqtonun passivliyindən dəfələrlə narazılıq ifadə ediblər. Eyni zamanda, Donald Trampın yaxın çevrəsinə daxil olan Stiv Uitkoff və Cared Kuşnerin mümkün səfərləri gündəmdə qalsa da, Berlin Yuri Uşakovun açıqlamalarını ABŞ təminatlarına etimadın azalmasının siqnalı kimi qiymətləndirir.

Müəllif: Adəm