Rusiyada benzin böhranı gizlədilir: Hər şey bahalaşacaq - Deputat hökuməti ittiham etdi

Rusiyada yanacaq böhranının miqyasının ictimaiyyətdən gizlədildiyi iddia olunur.

Publika.az xəbər verir ki, bu barədə Rusiya Dövlət Dumasının Ailə, Atalıq, Analıq və Uşaqlarla İş üzrə Komitəsinin sədri Nina Ostanina bildirib.

Onun sözlərinə görə, ölkədə neft emalı zavodlarının təxminən üçdə biri fəaliyyət göstərmir, lakin hökumət rəsmiləri bu problemi ictimai şəkildə müzakirə etməkdən yayınırlar.

Ostanina "Telegram" kanalında yazıb ki, kənd təsərrüfatı naziri və ona nəzarət edən baş nazir müavini biçin mövsümü ərəfəsində susqunluq nümayiş etdirirlər.

"Niyə kənd təsərrüfatı naziri və onu kurasiya edən baş nazir müavini biçin kampaniyası ərəfəsində susur? Ölkə taxılsız qala bilər. Beynəlxalq sanksiyalar şəraitində bu, fəlakətə çevrilə bilər", - deputat qeyd edib.

Ostaninanın sözlərinə görə, Vladimir və Moskva vilayətlərində bir sıra yanacaqdoldurma məntəqələri bağlanıb, burada nə növbə var, nə də benzin.

Deputat hesab edir ki, yük maşınlarının toplaşması daşınan məhsulların qiymətinin yaxın günlərdə və ya payızın əvvəlində qaçılmaz şəkildə bahalaşacağını göstərir.

Ostanina yaranmış vəziyyətin sentyabrda keçiriləcək Dövlət Dumasına seçkilərin nəticələrinə də təsir edə biləcəyini vurğulayıb.

"Seçicilər sentyabrda kimə səs verəcəklərini ciddi şəkildə düşünəcəklər. Elektron səsvermə və ya çoxgünlük səsvermə də müəyyən şəxsləri xilas etməyəcək", - deyə deputat bildirib.

Qeyd edək ki, Ostaninanın səsləndirdiyi iddialarla bağlı Rusiya hökuməti tərəfindən hələlik rəsmi açıqlama verilməyib.

Adəm