Tokayev Şanxaydan dünyaya mesaj verdi: Qazaxıstanın böyük planı...

Qazaxıstan prezidenti Kasım-Jomart Tokayev ölkəsinin Çin, Mərkəzi Asiya, Qafqaz, Yaxın Şərq və Avropanı birləşdirən əsas nəqliyyat-logistika mərkəzinə çevrilməsinin strateji hədəf olduğunu bildirib.

Publika.az xəbər verir ki, Tokayev bu barədə Şanxayda yüksək texnologiyalar sahəsində fəaliyyət göstərən Çin şirkətlərinin rəhbərləri ilə görüşdə danışıb.

Prezident vurğulayıb ki, Çinlə Avropa arasında həyata keçirilən dəmir yolu daşımalarının təxminən 85 faizi Qazaxıstan üzərindən keçir.

Onun sözlərinə görə, məqsəd Avrasiyada vahid rəqəmsal nəqliyyat məkanının formalaşdırılmasıdır ki, bu da malların sərhədləri rəqəmsal məlumatlar qədər sürətli keçməsinə imkan yaradacaq.

Tokayev həmçinin qeyd edib ki, Çin indiyədək Qazaxıstan iqtisadiyyatına 30 milyard dollardan çox investisiya yatırıb. 2025-ci ildə iki ölkə arasında ticarət dövriyyəsi 49 milyard dollara çataraq rekord göstərici olub. Hazırda Qazaxıstanda Çin kapitalı ilə 8500-dən çox müəssisə fəaliyyət göstərir.

O əlavə edib ki, ölkəsinin məqsədi təkcə investisiya cəlb etmək deyil, həm də Çinlə birlikdə yeni texnologiyalar hazırlamaq, elmi-tədqiqat mərkəzləri yaratmaq və yüksək texnologiyalı istehsal sahələrini inkişaf etdirməkdir.