Peskovun həyat yoldaşı Ukraynanın ərazi bütövlüyünü dəstəkləyir? - Məhkəməyə üz tutdu

Kremlin sözçüsü Dmitri Peskovun həyat yoldaşı, fiqurlu konkisürmə üzrə Olimpiya çempionu Tatyana Navka Avropa İttifaqı tərəfindən ona qarşı tətbiq edilən sanksiyalara etiraz olaraq məhkəməyə müraciət edib.

Publika.az xəbər verir ki, bu barədə "Reuters" agentliyi məlumat yayıb.

Aİ Navkanı 2022-ci ilin iyun ayında sanksiya siyahısına əlavə edib. Peskovun qızı Yelizaveta və oğlu Nikolay da eyni siyahıda yer alıb.

Brüssel bildirmişdi ki, Aİ-yə giriş qadağası və maliyyə məhdudiyyətlərini əhatə edən sanksiyalar "Ukraynanın ərazi bütövlüyünü, suverenliyini və müstəqilliyini sarsıdan və ya təhdid edən hərəkətlərlə əlaqədar" tətbiq edilib.

Navka Aİ Məhkəməsi vasitəsilə ona qarşı sanksiyaları ləğv etməyə çalışır.

İddia ərizəsində deyilir ki, o, ona məhdudiyyətlərin tətbiq edilməsi üçün əsasların düzgün göstərilmədiyini, qanunun tətbiqində və faktiki halların qiymətləndirilməsində səhvlərə yol verildiyini və Aİ-nin onunla sanksiyalarının məqsədi arasında kifayət qədər əlaqəni sübut edə bilmədiyini iddia edir.

Navka Avropa Birliyi Şurasından maddi ziyana, eləcə də nüfuzuna dəyən ziyana və digər qeyri-maddi itkilərə görə ümumilikdə 2 milyon avrodan bir qədər çox kompensasiya tələb edir.

Belə çıxır ki, Brüsselin sanksiyalarla bağlı iddialarını qəbul etməyən Peskovun həyat yoldaşı Ukraynanın ərazi bütövlüyünü, suverenliyini və müstəqilliyini dəstəkləyir, yəni Kremlin siyasətinə qarşı çıxır.

Müəllif: Tural