Kadırovun prezidentliyə namizədliyi təsdiqləndi

Çeçenistan Respublikasının hazırkı rəhbəri Ramzan Kadırov region rəhbərinin qarşıdan gələn seçkilərinə namizəd qismində qeydiyyata alınıb.

Publika.az xəbər verir ki, bu barədə respublika seçki komissiyasının mətbuat xidməti məlumat yayıb.

"Çeçenistan Respublikası Seçki Komissiyası "Vahid Rusiya" Ümumrusiya siyasi partiyasının Çeçenistan regional bölməsi tərəfindən irəli sürülmüş Çeçenistan Respublikasının Rəhbəri vəzifəsinə namizəd, Rusiya Qəhrəmanı Ramzan Əhmədoviç Kadırovu qeydiyyata alıb", — deyə məlumatda bildirilir.

İyul ayında Kadırov sentyabrda keçiriləcək seçkilərdə iştirak etmək üçün zəruri sənədləri təqdim edib.

O, rəsmi olaraq Çeçenistanın prezidenti vəzifəsini 2007-ci il aprelin 5-də tutub. Son seçkilər 2021-ci ildə keçirilib. Rusiya Mərkəzi Seçki Komissiyasının məlumatına görə, həmin seçkilərdə seçicilərin 99,7 faizi Kadırovun lehinə səs verib. Növbəti seçki prosesi 2026-cı il sentyabrın 20-nə, vahid səsvermə gününə təyin edilib. Kadırov "Vahid Rusiya"dan namizəd qismində irəli sürülüb.

Hüseyn İbadlı