Rusiyada miqrantlarla bağlı sərt qərarlar: 100 min nəfər ölkədən çıxarıldı

Rusiyada miqrantların ölkədən çıxarılması kəskin şəkildə artıb.

Publika.az xəbər verir ki, 2026-cı ilin ilk yarısında Rusiyada xarici vətəndaşların inzibati qaydada ölkədən çıxarılması ilə bağlı təxminən 100 min qərar qəbul edilib. Bu göstərici ötən ilin eyni dövrü ilə müqayisədə 2,6 dəfə çoxdur.

Moskva üzrə isə vəziyyət daha diqqətçəkəndir. Federal Məhkəmə İcraçıları Xidmətinin məlumatına görə, paytaxtda miqrasiya qanunvericiliyini pozduğuna görə ölkədən çıxarılan xarici vətəndaşların sayı iki dəfə artaraq 8,3 mindən 16 minə yüksəlib.

Dövlət Dumasının sədri Vyaçeslav Volodin bildirib ki, miqrantların törətdiyi cinayətlərin sayı da azalıb. Onun sözlərinə görə, 2026-cı ilin ilk altı ayında xarici vətəndaşların törətdiyi cinayətlərin sayı 40 faiz aşağı düşüb.

Volodin bu göstəriciləri miqrasiya sahəsində qəbul edilən yeni qanunvericilik normalarının tətbiqi ilə əlaqələndirib. Onun sözlərinə görə, ölkədən çıxarılma üçün əsasların genişləndirilməsi nəticəsində qanun pozuntularına qarşı tədbirlər sərtləşdirilib.

Qeyd edək ki, daha əvvəl 2023-cü ildən 2026-cı ilin may ayınadək Rusiyada 4,5 mindən çox miqrantın əldə etdiyi vətəndaşlığa xitam verildiyi açıqlanmışdı. Volodinin məlumatına əsasən, bu qərarların təxminən 40 faizi son bir ilin payına düşüb.

Müəllif: Adəm