ABŞ-ın casus təyyarəsi Rusiya sərhədləri yaxınlığında

ABŞ Hərbi Hava Qüvvələrinə (HHQ) məxsus “Bombardier ARTEMIS II” kəşfiyyat təyyarəsi avqustun 18-də təxminən beş saat ərzində Kalininqrad vilayətinin ətrafında patrul xidməti həyata keçirib.

Publika.az xəbər verir ki, bu barədə uçuş məlumatlarına istinadla “RİA Novosti” yazır.

Təyyarə Rumıniyanın Konstanta şəhərinin hava limanından Bakı vaxtı ilə saat 10:00 radələrində havalanıb. Təxminən saat 11:50-də o, Rusiya ərazisi yaxınlığında dairəvi trayektoriyaya çıxıb. Orada “Bombardier ARTEMIS II” Polşa və Litvanın hava məkanını kəsərək, Rusiya sərhədlərinə 50 km-dən daha yaxın yaxınlaşmadan Kalininqrad vilayətinin ətrafında uçuş həyata keçirib. Bakı vaxtı ilə saat 16:40 radələrində hava gəmisi trayektoriyadan çıxaraq uçuş bazasına tərəf yönəlib.

Agentlik uçuş məlumatlarına istinadla həmçinin yazır ki, eyni vaxtda ABŞ HHQ-nin digər təyyarəsi də Kalininqrad vilayətinin yaxınlığında uçub. “Gulfstream EA-37B Compass Call II” radioelektron mübarizə təyyarəsi iki saatdan çox müddətdə Polşanın Qdansk şəhərindən bir qədər qərbdə, Rusiya Federasiyası ərazisinin sərhədindən təxminən 100 km məsafədə olub.

Hüseyn İbadlı