Rusiya sülh deyil, səfərbərlik istəyir - Zelenski

Ukrayna prezidenti Vladimir Zelenski Rusiyanın müharibəni bitirmək niyyətində olmadığını və ABŞ-da bununla bağlı bütün illüziyaların aradan qalxdığını bildirib.

Publika.az xəbər verir ki, Zelenski bunu Ukraynanın Müstəqillik Günü münasibətilə müraciətində deyib.

Onun sözlərinə görə, Rusiya sülh deyil, səfərbərlik istəyir və buna görə Ukrayna ordusunu gücləndirməlidir.

“Putin bizim yorulduğumuzu düşünür. Biz isə bilirik ki, o ölümlüdür. Siz bütün Ukraynanı və torpaqlarımızı ələ keçirmək istəyirdiniz, əvəzində neft emalı zavodlarınızı, donanmanızı, gəlirlərinizi və bütöv bir nəslinizi itirdiniz”, - Zelenski qeyd edib.

Ukrayna lideri ABŞ-ın Rusiyanın müharibəni başa çatdırmaqla bağlı illüziyalarının qalmamasını müsbət qiymətləndirib. O, Vaşinqtonun Ukraynaya daha çox silah verməli olduğunu vurğulayıb:

“Biz sizin bizim üçün döyüşməyinizi istəmirik. Ukraynaya bu müharibəni bitirmək üçün lazım olan hər şeyi verin”.

Zelenski qeyd edib ki, əvvəllər ABŞ-ın Ukraynaya müəyyən silahların verilməsi ilə bağlı qərarları mümkünsüz hesab edilirdi, lakin sonradan Vaşinqton bu qərarları qəbul edib.

Müəllif: Adəm Abbaslı