Rusiya Ukrayna ilə müharibədə bu üsula əl atdı: Hədəfi özü seçəcək

Rusiya Ukraynada süni intellektlə idarə olunan və hədəfi müstəqil seçə bilən pilotsuz uçuş aparatlarından istifadə etməyə başlayıb.

Publika.az xəbər verir ki, bu barədə Ukrayna mətbuatı yazıb.

Məlumata görə, Rusiya ordusunun istifadə etdiyi "V2U" və “Molniya” tipli dronlarda süni intellekt sistemi hədəfi insan operatorunun müdaxiləsi olmadan müəyyənləşdirə bilir.

Belə dronlardan birinin iyulun 6-da Zaporojyedə yanacaqdoldurma məntəqəsinə hücum etdiyi bildirilib. Aparat binanın yanından keçə bilməyərək insanların gizləndiyi əraziyə çırpılıb və partlayıb. Hadisə nəticəsində üç mülki şəxsin öldüyü qeyd olunub.

Mütəxəssislərin diqqət çəkdiyi əsas məqam isə dronun son mərhələdə hədəfi özü müəyyənləşdirməsidir. Bu xüsusiyyət belə aparatların radioelektron mübarizə vasitələri ilə sıradan çıxarılmasını da çətinləşdirir, çünki dron uçuş zamanı radio siqnalı ötürməyə bilər.

Qeyd olunur ki, Ukrayna da süni intellektli zərbə dronları üzərində işləyir. Lakin Kiyevdə hədəfin son seçiminin tamamilə süni intellektə həvalə edilməsi ilə bağlı ciddi risklər olduğu bildirilib. Ukraynalı istehsalçılar belə sistemlərin səhv qərar verərək mülki şəxsi hədəf seçə biləcəyini vurğulayıblar.

Ekspertlər hesab edir ki, yaxın illərdə zərbə dronlarının hədəfi müstəqil seçməsi adi hala çevrilə bilər. Bu isə müharibədə insanın son qərar verən tərəf kimi rolunun azalması ilə bağlı ciddi təhlükəsizlik və hüquqi suallar yaradır.

Müəllif: Adəm