Rusiyada dəhşətli qəza - 6 nəfər öldü, 38 nəfər yaralandı

Stavropol diyarında sərnişin avtobusunun yük maşını ilə toqquşması nəticəsində altı nəfər həlak olub, daha 38 nəfər xəsarət alıb.

Publika.az xəbər verir ki, bu barədə Dövlət Yol Hərəkəti Təhlükəsizliyi Müfəttişliyindən məlumat verilib.

Xəsarət alanlar arasında 11 uşaq da var. Stavropol diyarının qubernatoru Vladimir Vladimirovun sözlərinə görə, dörd nəfər reanimasiya şöbəsinə yerləşdirilib.

Qəza gecə saat 1 radələrində “Qafqaz” federal avtomobil yolunun İnоzemtsevo ərazisindən keçən hissəsində baş verib. Gürcüstan–Moskva marşrutu üzrə hərəkət edən “Setra” markalı avtobus qarşısında hərəkətdə olan “KamAZ” markalı yük maşınına çırpılıb, daha sonra yoldan çıxaraq xəndəyə düşüb.

Xəsarət alanların hamısı Pyatiqorsk şəhərindəki xəstəxanalara çatdırılıb. Dörd uşağın vəziyyəti qənaətbəxşdir, bir uşaq isə reanimasiyadadır.

İlkin məlumata görə, avtobusun sürücüsü “KamAZ”a qədər olan məsafəni və hərəkət sürətini düzgün hesablamayıb.

Hadisənin bütün halları və səbəbləri Dövlət Yol Hərəkəti Təhlükəsizliyi Müfəttişliyinin və istintaq orqanlarının əməkdaşları tərəfindən araşdırılır.