Lavrovdan Berlinə cavab: "Bu, əsl müharibənin başlanğıcıdır!"

Rusiyanın xarici işlər naziri Sergey Lavrov diqqət çəkən açıqlamalar verib.

Publika.az TASS-a istinadən xəbər verir ki, o, Leypsiqdəki dron qalmaqalı ilə bağlı Qərbin Rusiyaya qarşı səsləndirdiyi ittihamları "əsl müharibənin başlanğıcı" adlandırıb. Rusiya XİN rəhbəri "Rossiya" telekanalının jurnalisti Pavel Zarubinə müsahibəsində deyib ki, dərhal verilən qərarlar diqqət çəkir: "Onlar dedilər ki, bu, Rusiya dronudur və heç kim araşdırma aparmağa çalışmadı. Bu, ümumilikdə əsl müharibənin başlanğıcıdır!".

Lavrov qeyd edib ki, Almaniya dərhal Berlindəki Rus Evini və Bonndakı Baş Konsulluğu bağlamaq qərarına gəlib. Rusiya rəsmisi xatırladıb ki, Böyük Vətən Müharibəsi başlamazdan əvvəl almanlar da diplomatik nümayəndəliklərini bağlamışdılar.

Xatırladaq ki, 5 avqust gecəsi Leypsiq hava limanında Ukraynaya məxsus An-124 təyyarəsinin yaxınlığında partlayıcı maddələr daşıyan dron tapılıb. Daha sonra yük təyyarəsi havada naməlum obyektlə toqquşub və təyyarənin quyruğuna zərər dəyib. Alman müstəntiqləri insidentlə bağlı iki nəfəri şübhəli bilirlər. Mediada yayılan məlumata görə, onlar Rusiya ilə əlaqəsi olduğu iddia edilən Latviya və Belarus vətəndaşlarıdır.

Müəllif: Tural