Yaponiyadan sonra Rusiyada da başladı: Ayılar kütləvi şəkildə öldürülür

Rusiyanın Altay Respublikasında yırtıcının turistə hücum etməsindən sonra ovçular 55 ayı öldürüblər.

Publika.az xəbər verir ki, bu barədə regional hökumətin mətbuat xidməti “VKontakte” sosial media platformasında məlumat yayıb.

Respublikada ayıların insanlara yaxınlaşması hallarının daha çox baş verdiyi qeyd edilib. Onqudai və Turoçak rayonlarında yüksək hazırlıq rejimi elan edilib. Sonuncu rayonda saat 20:00-dan 10:00-dək komendant saatı tətbiq olunur.

"İnsana hücum hadisəsi qeydə alınıb. Nəticədə ov icazələrinin sayı artırılıb; indiyə qədər 55 fərd ovlanıb", - məlumatda deyilir.

Hökumətin məlumatına görə, bölgədəki qəhvəyi ayıların ümumi sayı 4600-dən çoxdur. Populyasiyanı tənzimləmək üçün Altay Respublikasının Təbii Sərvətlər Nazirliyi onların ovlanması üçün 157 lisenziya verib.

Hakimiyyət orqanları sakinlərə və bölgəyə gələn qonaqlara ehtiyatlı olmağı və meşələrə baş çəkməkdən çəkinməyi tövsiyə edib.

Daha əvvəl Yaponiyada 14 min ayının öldürüldüyü barədə məlumat yayılmışdı.

Müəllif: Tural