Novorossiyskə hücum: Rusiyanın ən böyük limanı yanır

Ukraynaya məxsus pilotsuz uçuş aparatları sentyabrın 9-na keçən gecə Rusiyanın ən böyük dəniz limanlarından birinin yerləşdiyi Novorossiysk şəhərinə hücum edib.

Publika.az xəbər verir ki, bu barədə şəhər rəhbəri Andrey Kravçenko bildirib.

Onun sözləriə görə, PUA qalıqları müəssisələrin ərazisinə və yaşayış binasının yaxınlığına düşüb. İlkin məlumata görə, ölən və yaralanan olmayıb.

"Astra" "Telegram" kanalının hadisə şahidlərinin görüntülərinə əsasən apardığı araşdırmaya görə, hücumun hədəfi dəniz ticarət limanının tərkibinə daxil olan Novorossiysk mazut terminalı olub. Terminal dəmir yolu ilə gətirilən mazutun qəbulu, saxlanılması və gəmilərə yüklənməsi ilə məşğuldur və illik ötürmə gücü təxminən 4 milyon ton təşkil edir.

Hücum nəticəsində ən azı bir yanacaq çəni zədələnib. Yerli sakinlərin yaydığı videolarda terminal ərazisində güclü yanğın baş verdiyi görünür. Məlumata görə, Volqoqradskaya küçəsində yerləşən çoxmərtəbəli yaşayış binasında da yanğın qeydə alınıb.

Qeyd edək ki, Ukrayna ötən aydan Novorossiysk limanına hücumları intensivləşdirib. Liman Rusiyanın taxıl ixracının təxminən üçdə birinin həyata keçirildiyi mühüm mərkəz olmaqla yanaşı, neft, metal və konteyner yüklərinin dünya bazarlarına çıxarılmasında da əsas rol oynayır.

Ukraynanın Rusiya ərazisindəki ixrac infrastrukturlarına hücumlarının əsas məqsədinin Moskvanın gəlirlərini azaltmaq və müharibəni maliyyələşdirmək imkanlarını məhdudlaşdırmaq olduğu bildirilir.

Müəllif: Adəm