Kremldən Ukrayna müharibəsi ilə bağlı etiraf: Atəşkəs istəmirik...

Moskva danışıqlara açıq qaldığı müddətdə Rusiyanın müvəqqəti atəşkəs yox, sülhə ehtiyacı var.

Publika.az xəbər verir ki, bu barədə Rusiya prezidentinin mətbuat katibi Dmitri Peskov jurnalistlərə bildirib.

Peskov Vladimir Putinin “Valday” Beynəlxalq Müzakirə Klubunun iclasında verdiyi açıqlamanı xatırladaraq deyib: "Prezidentin dünən dediyi kimi, bizə atəşkəs yox, sülh lazımdır".

Kreml sözçüsünün sözlərinə görə, Moskva hərtərəfli razılaşmalara üstünlük verir, çünki təkbaşına fərdi razılaşmalar sülh yolu ilə həll yoluna nail olmaq iqtidarında deyil. Lakin Kiyev hazırda bu cür razılaşmalara girmək istəmədiyini göstərir.

Peskov həmçinin Qara dənizdəki vəziyyətə münasibət bildirərək, onun özünəməxsus xüsusiyyətlərinə malik olduğunu qeyd edib. O bildirib ki, Rusiya xüsusi hərbi əməliyyatlarını davam etdirir və Ukrayna Silahlı Qüvvələrinin ehtiyacları üçün Ukraynaya dəniz yolu ilə hərbi texnika, sursat və yanacaq tədarükünü pozmaq niyyətindədir.

Peskov həmçinin Rusiyanın Qara dənizdəki hərəkətlərinin Ukraynadan gələn hücumlara cavab olduğunu bildirib.

"Rusiya Ukraynanın başladığı hücumlara cavab verir. Ukrayna bunun bədəlini ödəməlidir; artıq ödəyir və ödəməyə davam edəcək", - deyə o bildirib.

Peskov bildirib ki, Qara dənizdə naviqasiya təhlükəsizliyinin təmin edilməsi ilə bağlı Türkiyə-BMT təşəbbüsünə gəldikdə, Moskva hələlik heç bir konkret təklif almayıb. Lakin Rusiya tərəfi təşəbbüsün özündən xəbərdardır.

Xatırladaq ki, daha əvvəl “Bloomberg” mənbələrə istinadən Türkiyə və BMT-nin Qara dənizdə atəşkəslə bağlı Rusiya və Ukrayna ilə danışıqlara hazırlaşdığını bildirmişdi.

Müəllif: Tural