Putin onları təriflədi: "Lazımi məlumatları vaxtında təqdim edirlər!"

Rusiya Prezidenti Vladimir Putin Kosmik Qüvvələrin komandanlığını, şəxsi heyət və veteranlarını onların peşə bayramı münasibətilə təbrik edib.

Publika.az xəbər verir ki, bununla bağlı sənəd Kremlin saytında dərc edilib.

Təbrik teleqramında bildirilir ki, bir neçə nəsil konstruktorların, alimlərin, mühəndislərin və hərbi mütəxəssislərin əməyi ölkəyə etibarlı raket və kosmik "qalxan" yaratmağa imkan verib. Putin bunu qlobal strateji paritetin qorunması üçün təsirli bir vasitə adlandırıb.

"Unikal texnologiyalar yaradılıb, güclü elmi və sənaye təməli qurulub", - deyə dövlət başçısı qeyd edib.

Rusiya Prezidenti onu da vurğulayıb ki, bu gün Kosmik Qüvvələrin hərbi və mülki heyəti Rusiyanın təhlükəsizliyinin qorunmasında mühüm vəzifələri yerinə yetirir. Onlar rabitə və naviqasiya sistemlərinin fəaliyyətini təmin edir və cəbhə bölgəsindəki bölmələr də daxil olmaqla Silahlı Qüvvələrə lazımi məlumatları vaxtında təqdim edirlər.

Putin orbital peyk qruplarının və yerüstü infrastrukturun imkanlarını genişləndirməyə çağırıb. O, ən yeni silah və avadanlıqlar üçün qabaqcıl texnologiyaların inkişaf etdirilməsinin, eləcə də qabaqcıl tədqiqatların aparılmasının vacibliyini vurğulayıb.

Müəllif: Tural