Məşhur çay bakteriyaya görə qadağan olundu - Azərbaycanda da satılır

Belarusda məşhur "Greenfield Buckwheat & Cocoabeans" çayının satışı qadağan edilib. Buna səbəb təhlükəsizlik qaydalarının pozulmasıdır.

Publika.az xəbər verir ki, bu barədə Belarus Dövlət Standartlaşdırma Komitəsi məlumat yayıb.

Komitə məhsullarda kif səviyyəsinin hədsiz dərəcə çox olduğunu və çaylarda qəbuledilməz səviyyədə koliform bakteriyalarının aşkarlandığını açıqlayıb. Təkcə kifin miqdarı normadan 70 dəfə çox olub.

10 oktyabr tarixindən etibarən bu çayların Belarusa idxalı, ölkədə dövriyyəsi və satışı qadağan edilib. Bundan əlavə, hazırda anbar və piştaxtalarda olan məhsullar da satışdan çıxarılmalıdır. Məhdudiyyət və qadağaların hansı müddətlik olması dəqiqləşdirilməyib.

"Greenfield" adı altında təqdim olunan çaylar Rusiyanın ən böyük çay və qəhvə istehsalçısı olan "Orimi" şirkəti tərəfindən istehsal olunur. Şirkət "Greenfield" ilə yanaşı, Leninqrad bölgəsindəki fabrikində "TESS", "Princess Nuri", "Princess Java", "Princess Kandy", "Gita", "Shah" və "Pearl of the Nile" brendləri altında çaylar, eləcə də "Jardin" və "Jockey" qəhvəsi istehsal edir.

Xatırladaq ki, Belarus 2024-cü ildə də Rusiyadan gələn "Greenfield" çayılarının idxalına qadağa qoymuşdu.

Qeyd edək ki, bu firmaya məxsus çaylar Azərbaycanda da satışa çıxarılır.

Müəllif: Tural