Lavrov Uitkoffa öncədən MESAJ VERDİ: "Rusiya ABŞ-a siyasi güzəşt etməyəcək"

Rusiya tərəfi danışıqlar aparan Stiven Uitkoff və Cared Kuşnerin təkliflərini dinləyəcək, lakin siyasi güzəştlərə getməyəcək.

Publika.az xəbər verir ki, bu barədə Rusiya xarici işlər naziri Sergey Lavrov ilk dəfə diplomatik xidmətə qəbul olunan ali məktəb məzunları ilə görüşündə bildirib.

“Nə təklif edəcəklərinə baxarıq. Əgər iqtisadi və maliyyə baxımından bizim üçün sərfəli olanı təklif etsələr, niyə də olmasın? Lakin bu, tərəfimizdən heç bir siyasi güzəştə getmədən və bütün dünya məsələlərində bizi irəli aparacaq siyasi rəğbət gözləmədən edilməlidir”, - nazir deyib.

O, həmçinin Rusiyanın yalnız özünə güvənməli olduğunu vurğulayıb.

Oktyabrın 20-də "Reuters" agentliyi mənbələrə istinadla Uitkoffun Rusiya Prezidenti Vladimir Putinlə görüşmək üçün Rusiyaya səfər etməyi planlaşdırdığını bildirib. Amerikanın "Axios" xəbər portalının məlumatına görə, bu görüş daha gec baş tuta bilər. Belə ki, oktyabrın 20-də və ya 21-də Uitkoff və Kuşner Osloda Ukrayna Prezidenti Volodimir Zelenski ilə görüşəcək, daha sonra isə Moskvaya yollanacaqlar.

Oktyabrın 8-də Rusiya Prezidentinin mətbuat katibi Dmitri Peskov Rusiya və ABŞ-ın iqtisadiyyat sahəsində potensial olaraq qarşılıqlı faydalı ola biləcək bir sıra layihələri müzakirə etdiklərini bildirib.

Hüseyn İbadlı