Putin KTMT-nin zirvə toplantısını harada keçirəcək? - Mühüm sənədlər imzalanacaq

Çərşənbə günü Moskvada Rusiya Prezidenti Vladimir Putinin sədrliyi ilə Kollektiv Təhlükəsizlik Müqaviləsi Təşkilatının (KTMT) Kollektiv Təhlükəsizlik Şurasının sessiyası keçiriləcək.

Publika.az xəbər verir ki, bu barədə Kremlin mətbuat xidməti məlumat yayıb.

Sammitin gündəliyinə iştirakçı dövlətlər arasında çoxtərəfli əməkdaşlığın dərinləşdirilməsi, eləcə də alyansın kollektiv təhlükəsizlik sisteminin modernləşdirilməsi və təkmilləşdirilməsinə yönəlmiş tədbirlərin müzakirəsi daxildir.

Bundan əlavə, təşkilata üzv ölkələrin liderləri beynəlxalq və regional müstəvidə aktual çağırışları və təhdidləri müzakirə etməyi planlaşdırırlar.

İclasın yekununda bir sıra mühüm sənədlərin imzalanması gözlənilir. Bunların arasında 2030-cu ilədək olan dövrü əhatə edən KTMT-nin yeni antiterror strategiyası, eləcə də sammitin yekun bəyannaməsi var. Bundan başqa, görüş zamanı təşkilata sədrlik səlahiyyətlərinin 2027-ci il yanvarın 1-dən qüvvəyə minməklə Tacikistan Respublikasına verilməsi barədə qərar rəsmən təsdiqlənəcək.

Bundan əvvəl Belarus Prezidenti Aleksandr Lukaşenko Vladimir Putinlə “iki-üç məsələni” müzakirə etmək istədiyini bildirib. Dövlət başçılarının danışıqları çərşənbə axşamı axşam saatlarında, KTMT Kollektiv Təhlükəsizlik Şurasının iclası ərəfəsində Putinin şəxsi dəvəti ilə Moskvaətrafı Novo-Oqaryovo iqamətgahında keçirilib.

Hüseyn İbadlı