İsrail əsirlərlə bağlı mühüm məlumat yaydı

İsrail Baş naziri Binyamin Netanyahunun ofisi Qəzza zolağından olan ilk əsirlərin planlaşdırıldığı kimi yanvarın 19-dan etibarən azadlığa çıxacağını təsdiqləyib.

Publika.az xəbər verir ki, bu haqda “The Times of Israel” məlumat yayıb.

Məlumata görə, HƏMAS-la İsrail tərəfi arasında əldə olunmuş razılaşmaya əsasən, bazar günü HƏMAS üç əsiri azad etməlidir. Razılaşmanın ilkin mərhələsində qruplaşma ümumilikdə 33 əsiri sərbəst buraxmağı öhdəsinə götürüb. Həmin şəxslərin siyahısı artıq İsrail mətbuatında dərc olunub.

Öz növbəsində İsrail Ədliyyə Nazirliyi razılaşmanın birinci mərhələsində İsrail həbsxanalarından azad ediləcək 95 fələstinli məhbusun adlarının siyahısını açıqlayıb. Nazirlik bildirib ki, bu, tam siyahı deyil və yalnız birinci mərhələyə aiddir. Tam siyahı hökumət sazişi təsdiqlədikdən sonra açıqlanacaq.

Qeyd edək ki, HƏMAS-la İsrail arasında əldə olunmuş barışıq haqda saziş İsrailin hərbi-siyasi kabineti və nazirlər kabineti tərəfindən təsdiq olunduqdan sonra qüvvəyə minəcək.