Qu quşu qatarların hərəkətini İFLİC ETDİ

Şotlandiyanın ən işlək dəmir yolu stansiyasında qatarların hərəkəti qeyri-adi bir səbəbdən - pik saatda relslərə çıxan bir qu quşuna görə iflic olub.

Publika.az xəbər verir ki, bu barədə "Sky News" məlumat yayıb.

Stansiyanın infrastrukturuna cavabdeh olan "Network Rail" şirkəti qatarların hərəkətini dayandırmağa və sürət məhdudiyyəti tətbiq etməyə məcbur qalıb. Bu isə ciddi gecikmələrə və reyslərin ləğvinə səbəb olub.

Quşu xilas etmək üçün xüsusi operativ reaksiya qrupu dərhal hadisə yerinə göndərilib. Dəmir yolu işçiləri sosial şəbəkələrdə “günahkar” qu quşunun fotosunu paylaşaraq bildiriblər ki, komandalar onu təhlükədən uzaqlaşdırmaq və normal hərəkəti bərpa etmək üçün çalışırlar.

Onların sözlərinə görə, qu quşu “bir qədər narahat olsa da, yaxşı vəziyyətdədir”. Cədvəlin tam sabitləşməsi və qatarların öz marşrutlarına qayıtması üçün əlavə üç saat vaxt tələb olunub.

Bir neçə saat sonra şirkət açıqlama verərək, gözlənilməz maneə səbəbindən yaranan bütün hərəkət pozuntularının aradan qaldırıldığını və dəmir yolu qovşağının normal rejimə qayıtdığını bildirib.

Hüseyn İbadlı