1 iyuldan yol hərəkəti sığortasında yeni dövr: Qaydalar dəyişir

1 iyul 2026-cı il tarixindən etibarən Türkiyədə yol hərəkəti sığortası sistemində mühüm dəyişikliklər qüvvəyə minir.

Publika.az yerli mediaya istinadən xəbər verir ki, yeni qaydalara əsasən, qəzalardan sonra yaranan dəyər itkisi kompensasiyası üçün əlavə müraciət tələbi ləğv edilir, proses tam avtomatlaşdırılır.

Sığorta və Özəl Pensiya Tənzimləmə və Nəzarət Qurumu (SEDDK) tərəfindən hazırlanan tənzimləməyə görə, qəza sonrası avtomobillərin dəyər itkisi ekspertlər tərəfindən birbaşa sistem üzərindən hesablanacaq və avtomatik ödəniləcək. Sürücülərin ayrıca sığorta şirkətlərinə müraciət etməsinə ehtiyac qalmayacaq.

Yeni sistemdə ekspertlər avtomobilin marka, model, istehsal ili və əvvəlki zədələrini nəzərə alaraq qiymətləndirmə aparacaq. Bu, həm prosesin sürətlənməsinə, həm də şəffaflığın artmasına xidmət edəcək.

Eyni zamanda, təmir işlərində orijinal ehtiyat hissələrinin istifadəsi məcburi olacaq. Sığorta şirkətləri hesablanan kompensasiya məbləğlərini “e-Devlet” və SMS vasitəsilə dərhal vətəndaşlara bildirəcək.

Qeyd olunub ki, yeni qaydaların məqsədi sürücülərin hüquqlarını daha effektiv qorumaq və sığorta proseslərini daha şəffaf və operativ hala gətirməkdir.

Müəllif: Roza