BDYPİ sürücülərə müraciət etdi

Baş Dövlət Yol Polisi İdarəsi (BDYPİ) ölkə ərazisində gözlənilən qeyri-sabit hava şəraiti ilə əlaqədar sürücü və piyadalara müraciət edib.

Publika.az xəbər verir ki, Milli Hidrometeorologiya Xidmətinin məlumatına əsasən, bu gündən etibarən ölkənin bəzi ərazilərində müşahidə olunan qeyri-sabit hava şəraitinin avqustun 14-dək davam edəcəyi gözlənilir.

Bildirilib ki, ayrı-ayrı ərazilərdə fasilələrlə yağış yağacaq, bəzi yerlərdə yağıntılar leysan xarakterli və intensiv olacaq.

BDYPİ sürücüləri hava və yol şəraitini nəzərə almağa, nəqliyyat vasitələrini idarə edərkən xüsusilə diqqətli və ehtiyatlı olmağa çağırıb.

Yağıntılı və görmə məsafəsinin məhdud olduğu şəraitdə sürətin azaldılması, avtomobillər arasında ara məsafəsinin artırılması, qəfil manevr və kəskin tormozlamalardan çəkinilməsi, işıq cihazlarından düzgün istifadə edilməsi tövsiyə olunub.

Piyadalara da yağışlı havada daha diqqətli olmaları tövsiyə edilib. Qeyd olunub ki, yol örtüyünün sürüşkən olması və görmə məsafəsinin azalması avtomobillərin dayanma məsafəsini artıra bilər. Bu səbəbdən piyadalar yolu yalnız müəyyən edilmiş keçidlərdən keçməli, hərəkət hissəsinə qəfil çıxmamalı və yolu keçərkən diqqəti yayındıran cihazlardan istifadə etməməlidirlər.

“Bir daha yol hərəkəti iştirakçılarını gözlənilən əlverişsiz hava şəraitində yol hərəkəti qaydalarına ciddi əməl etməyə, diqqətli və məsuliyyətli davranmağa çağırırıq”, – müraciətdə bildirilib.