"TikTok"a görə dəhşətli qəza törətdi, qızıl tabutda dəfn edildi - VİDEO+FOTOLAR

Böyük Britaniyada ağır yol qəzasına səbəb olan 15 yaşlı yeniyetmə qızıl tabutda dəfn edilib.

Publika.az xəbər verir ki, bu barədə "Metro" qəzeti məlumat yayıb. Nəşrin məlumatına görə, dəfn mərasiminə gələnlər üzərində mərhumun şəkli olan ağ köynək geyiniblər. Quraşdırılan böyük ekranda isə onun həyatından bəhs edən video və fotolar nümayiş etdirilib.

Qəzetin məlumatına görə, yeniyetmə dostları ilə "TikTok" üçün video çəkməyi planlaşdırırmış. O, sosial şəbəkə hesabına baxış sayı toplayan video yerləşdirmək üçün BMW oğurlayıb. Yeniyetmələr idarəetməni itiriblər və qarşı yola çıxaraq başqa avtomobillə toqquşublar. Həmin avtomobildə isə sürücü ailəsini aparırmş. Fəal TikTok istifadəçiləri olan yeniyetmələr həlak olublar, digər avtomobildəki sərnişinlər isə ağır yaralanıblar.

"Metro"nun məqaləsində o da vurğulanıb ki, avtomobil oğurlayan yeniyetmələr polis bölməsinə düşəcəklərindən belə narahat deyilmişlər. Çünki onlar əvvəlcədən bilirlərmiş ki, Britaniya ədliyyə sisteminə görə yetkinlik yaşına çatmayanlara cəza verilə bilmir.

Dəhşətli qəzadan sonra Britaniya siyasətçiləri sosial media platformalarını avtomobillərin təhlükəli sürülməsini əks etdirən məzmunları məhdudlaşdırmamaqda və ya dərhal silmədikləri üçün tənqid ediblər. "TikTok" nümayəndələri isə bu cür videoların internetdə yayılmasını araşdıran parlament komitəsi qarşısında açıq ifadə verməkdən imtina ediblər və bunun əvəzinə qapalı brifinq təklif ediblər.

Müəllif: Tural