“Azərbaycanda bütün xarici KİV-in fəaliyyəti üçün zəruri şərait yaradılıb. Ancaq xarici KİV Azərbaycanda fəaliyyət göstərmək istəyirsə, jurnalistlərini qanuna müvafiq olaraq qeydiyyatdan keçirməlidir”.
Publika.az-ın məlumatına görə, bu sözləri bu gün Bakıda keçirilən “Azərbaycan Respublikasının Milli Məclisinə seçkilər: seçkiqabağı təşviqat prosesində KİV-lərin rolu və vəzifələri” mövzusunda seminar-müşavirədə çıxışı zamanı Azərbaycan Prezidentinin ictimai-siyasi məsələlər üzrə köməkçisi Əli Həsənov bildirib.
Ə.Həsənov deyib ki, Azərbaycanda hər bir jurnalist öz vəsiqəsini göstərməklə seçkini izləyə bilər: “Amma bu, Azərbaycanda fəaliyyət göstərən xarici KİV-ə aid deyil.
Ancaq xarici KİV Xarici İşlər Nazirliyində akkreditasiyadan keçəndən və MSK-ya məlumat verərək müvafiq sənəd alandan sonra seçkini izləmək hüququ əldə edir. Həmin jurnalistlər və onların ətrafında anti-Azərbaycan kampaniyası aparmaq istəyən dairələr bilməlidirlər ki, Azərbaycanda bu və ya digər fəaliyyəti həyata keçirmək üçün hüquqi normaları yerinə yetirmək lazımdır”.
Vasif Həsənli
