Nida.az

MSK seçki bülletenlərinin çapına başladı - FOTOLAR

14 Oktyabr 2015 12:47

Mərkəzi Seçki Komissiyası (MSK) bu ilin noyabrın 1-də keçiriləcək parlament seçkilərində səsvermə günü üçün seçki bülletenlərinin çapına başlayıb.

Publika.az-ın məlumatına görə, bu məqsədlə MSK sədri Məzahir Pənahov Milli Məclis Aparatının mətbəəsinə baş çəkib, görülən işlə tanış olub.

M.Pənahov deyib ki, səsverməyə 10 gün qalana qədər, yəni oktyabrın 22-dək seçki bülletenləri tam çap olunmalıdır: “125 seçki dairəsi üzrə ümumilikdə 5 milyon 344 min 431 səsvermə bülleteni çap olunacaq. Bu da seçicilərin sayından 3 faiz çoxdur. Səsvermə bülletenləri 5 gün qalana qədər DSK-lara, 3 gün qalana qədər isə məntəqə seçki komissiyalarına paylanılır. Hesab edirəm ki, bu prosesdə heç bir problem yoxdur”.

O bildirib ki, əvvəlcə Naxçıvandakı seçki dairələrinə, sonra isə ucqar rayonlardakı seçki dairələrinə bülletenlər paylanılacaq.

MSK sədri seçki prosesində jurnalistləri fəal olmağa çağırıb.

Vasif Həsənli