Nida.az
Bakı və Tehranda eyni günün hadisəsi: təsadüf, yoxsa xüsusi plan?
Güney Azərbaycanda baş verən etiraz aksiyaları diqqəti
noyabrın 6-da Bakıda və Tehranda baş verən iki hadisəyə
yönəltdi.
5 noyabr tarixində “Facebook” sosial şəbəkəsində “Müsəlman
Birliyi Hərəkatı”nın sədri Tale Bağırzadənin adına yaradılmış “Gənc
lider Tale Bağırzadə” səhifəsində saat 21:22-də bu sözlər
paylaşıldı: “Müsəlman Birliyi Hərəkatı”nın sədr müavini Elçin
Qasımov Maştağa məscidindən çıxarkən 14-cü polis bölməsinə
aparılıb. Hər kəs polis idarəsinin qarşısına yığılsın, artıq
möminlər həmin bölməyə tərəf gedirlər”.
Birliyin tərəfdarlarının polis bölməsinə hücum etməsi ilə
başlanan qarşıdurma noyabrın 6-da səhər saatlarına qədər davam
etdi. Təxribatın qarşısı alındı. Lakin bu baş verənlərin alt
qatındakı məqamları üzə çıxardı. “Müsəlman Birliyi Hərəkatı”nda
təmsil olunanların polis tərəfindən saxlanılması aşura günündə
Gəncədə yaratdıqları qarşıdurma, ardınca sosial şəbəkələrdə dövlətə
qarşı təhdid mesajlarının verilməsi idi. Təhlükəli məqamları
araşdırıb öyrənmək və qarşısını almaq vəzifəsini yerinə yetirən
hüquq-mühafizə orqanlarının birliyin rəhbərliyini saxlamasında
təəccüblü heç nə yoxdur. Maraqlı məqam, birliyin tərəfdarları
tərəfindən dövlətə qarşı təhdidlərin davam etməsi idi.
Noyabrın 6-da axşam saatlarında İran televiziyasının 2-ci
kanalında yayımlanan “Fitilə” proqramının “Hotel Fitilə” adlanan
hissəsində Azərbaycan türkləri (azərbaycanlılar) təhqir olundu. Bu
təhqirə qarşı soydaşlarımız noyabrın 9-da aksiyalara başladı.
İranın Tele-radio şirkətinin sədri Məhəmməd Sərəfraz baş vermiş
“səhvə” görə üz istədi. Bildirdi ki, bir sıra proqramları
hazırlayanlara töhmət verilib və bir sıra əməkdaşlar işdən
çıxarılıb. Lakin o söhbətin hansı proqramdan getməsini
açıqlamadı.
Hadisələrin məkan və zamanı fərqli olsa da, bir-biri arasında
paralellər aparmaq mümkündür. Xüsusilə Bakıda qarşıdurma yaratmağa
cəhd edən “Müsəlman Hərəkatı Birliyinin” sədri Tale Bağırzadənin
İrana yaxınlığı fonunda. Bu baxımdan hesab etmək olar ki, İran
tərəfi Azərbaycanda öz dəstəkçilərinə qarşı addımları həzm edə
bilməyib və soydaşlarımızı təhqir etməklə bir növ “qisas” alıb.
Digər tərəfdən, bu hadisələrin öncədən planlı şəkildə həyata
keçirildiyi versiyası daha inandrıcıdır. İstər T. Bağırzadənin
indiyə qədərki fəaliyyəti, istər “Müsəlman Hərəkatı Birliyi”
yaranma tarixi, istərsə geosiyasi situasiyada dəyişən vəziyyətdə
İran siyasətindəki dirçəlmələr bunu deməyə əsas verir. Lakin İran
telekanalında soydaşlarımızın təhqir olunması ilə İrana bağlı
şəxslərin Bakıda qarşıdurma yaratmaq cəhdlərinin
paralelləşdirilməsinə münasibət birmənalı deyil.
Tehran ölkəmizdəki iranmeylliləri müdafiə
edir
Politoloq Sədrəddin Soltan Publika.az-a açıqlamasında bildirib ki, məsələ yalnız Azərbaycandakı iranmeylli hansısa təşkilatın fəaliyyətində deyil: “Tehran hakimiyyəti Güney Azərbaycan türklərinin milli haqlarının təmin edilməsi hərəkatını dünyanın hər yerində əngəlləməyə çalışır.
Təəssüf ki, buna bir sıra hallarda nail də olur. İrandakı
hakimiyyətin Azərbaycan Respublikasındakı fəaliyyətlərindən biri də
bu yöndədir. Tehran ölkəmizdəki iranmeylliləri müdafiə edir. Ancaq
Güney Azərbaycan türklərinin haqlarının pozulması hallarına Quzey
Azərbaycanda etiraz ediləndə bunu hüquqi müstəviyə daşımağa
çalışır. Bununla da qonşuluq və beynəlxalq hüququ pozaraq, cığallıq
etməyə başlayır. Bu baxımdan iranmeylli qüvvələr daha çox Güney
Azərbaycandakı Milli Hərəkata Şimaldan mənəvi dəstək verilməsinə
qarşıdır. İranda gələn istənilən din xadiminin əlini öpənlər də heç
vaxt Azərbaycanın dünyəvi dövlətini sevə bilməz. Çünki onların
təqlidi öz dövlətinə deyil, xaricədir. Onların bütün fəaliyyəti
əllərini öpdüyü bu və ya başqa din xadiminin fitvasına əsaslanır.
Bu insanlar təqlidçidirlər. Tehran belələrindən istifadə edərək,
Azərbaycanda da İrandakı hakimiyyətə oxşar rejim qurmaq
iddiasındadırlar. Bunu bacarmasalar belə Azərbaycan cəmiyyətində
nifaq sala bilirlər. Ona görə də yanlış olaraq “inanclı”
adlandırılan bu qüvvələrin bir adı var – iranmeyllilər”.
İranmeyllilərin fəallaşması Tehranın Azərbaycanla
münasibətlərində cığallığının göstəricisidir
S. Soltan qeyd edib ki, Azərbaycanda yalnız əl öpənlərə inanclı
adamlar deyilməsi də kökündən səhvdir. Politoloqun fikrincə, İran
televiziyasında yayımlanan sonucu verilişin adıçəkilən
iranmeyllilərlə əlaqəsi yoxdur: “İran hakimiyyətinin informasiya
vasitələrinin türkləri təhqir etməsi birinci dəfə deyil. Onların
təbliğat maşını davamlı olaraq, bu sayaq ideoloji materiallar
yayır. İranmeyllilərin fəallaşması isə fikrimcə, İranın
Azərbaycanla münasibətlərində cığallığının göstəricisidir. Bura
bölgədə və Orta Şərqdə gedən proseslərdə Azərbaycanın mövqeyi də
aiddir. Tehran bu kimi qüvvələrdən ölkəmizə qarşı təzyiq vasitəsi
olaraq istifadə edir”.
Azərbaycanlıların ayağa qalxması İran üçün acı nəticələr
verə bilər
Keçmiş təhlükəsizlik zabiti, “Trend” informasiya agentliyinin direktor müavini Arzu Nağıyev də Publika.az-a açıqlamasında bu iki hadisə arasında paralellik aparmağın tərəfdarı olmadığını bildirib: “Çünki səbəb və məqsədlər fərqlidir. Artıq tək İrandakı azərbaycanlılar deyil, digər xalqların nümayəndələri də etirazlara qoşulurlar. Məlumdur ki, bu gün İranın azərbaycanlılar yaşayan bütün bölgələrində kütləvi etirazların keçirilməsi mütəmadi olaraq baş verir və bu da hakimiyyətin azərbaycanlılara qarşı göstərdiyi neqativ münasibətlərdən qaynaqlanır. 2006-cı ildə də Azərbaycan dili ilə bağlı karikatura belə bir narazılıq yaratdı. Bugünkü narazılıqlara isə teleməkanda azərbaycanlılarla bağlı təhqirli ifadələr rəvac verdi.
Baxmayaraq ki, İran hakimiyyəti bunun səbəbini məişət problemi
kimi izah edir, lakin burada milli müstəqillikdən söhbət gedir.
Yəni əsas səbəb və son məqsəd budur. Bundan başqa repressiyalardan
çəkinən hakimiyyət özlərinin demokratik dəyərlərə müsbət qiymət
verdiklərini Qərbə göstərməyə çalışır. Çünki sanksiyaların
götürüləcəyi bir vaxtda belə bir addım atmaq acı nəticələrə gətirib
çıxara bilər. Bununla yanaşı, İran əhalisinin demək olar ki, dörddə
birini təşkil edən azərbaycanlıların ayağa qalxması acı nəticələr
verə bilər”.
Asif Nərimanlı
-
Səhiyyə05:15
Ömrü uzadan pəhriz sınaqdan UĞURLA ÇIXDI
-
Avropa03:43
Meqan Markl Keyt Middletonun xəstəliyindən necə istifadə etdi? - ŞOK DETALLAR
-
Avropa02:00
Azərbaycanlı jurnalist Kiyevdə vəfat etdi - FOTO
-
Magazin101:41
Azərbaycanda tanınmış müğənni üçün 2-ci dəfə TOY ÇALINACAQ - VİDEO
-
Magazin100:30
“Sonradan soyunanda göz öyrəşmir” - FOTO
-
Qoroskop00:15
Günün ULDUZ FALI: çox ciddi münaqişə baş verə bilər
-
Sosial28 Mart 22:50
Əhaliyə ŞAD XƏBƏR: pensiya və müavinətlər artırıla bilər - VİDEO
-
İdman28 Mart 22:24
UEFA-dan Avro-2024-lə bağlı YENİLİK - Yekun qərar bu tarixdə veriləcək