• USD 1,7000 0,00% EUR 1,8808 -0,11%
    • GBP 2,1958 -0,09% RUB 0,0267 +0,37%

BAXCP təkliflə çıxış etdi

  • Nida.az
  • 8 Fevral 2016 18:34
  • 635 Baxış
BAXCP təkliflə çıxış etdi

Bu gün Bütöv Azərbaycan Xalq Cəbhəsi Partiyası (BAXCP) İdarə Heyətinin iclası keçirilib. Partiyadan Publika.az-a daxil olan məlumatda qeyd olunur ki, iclasda ictimai-siyasi vəziyyət və təşkilati məsələlər müzakirə olunub.

İctimai-siyasi vəziyyətin müzakirəsi zamanı əsas diqqət ölkə iqtisadiyyatında baş verən proseslərə yönəldilib. Azərbaycan hökumətini iqtisadi islahatları sürətləndirməyə çağıran BAXCP İdarə Heyəti bu müstəvidə zaman itkisinə yol verilməsinin ciddi fəsadlara yol aça biləcəyini vurğulayıb.

Qeyd olunub ki, Neft Fonduna daxil olan vəsaitlərin həcmi əhəmiyyətli dərəcədə azalıb və yaranmış vəziyyət çevik, təxirəsalınmaz və səmərəli addımların atılmasını tələb edir: “Neft Fondunun fəaliyyəti ilə bağlı aparılan araşdırmalar bu qurumun idarəçiliyində olan vəsaitlərdən səmərəli istifadə etmədiyini göstərir. Belə olduğu təqdirdə, Neft Fondunun ayrıca bir qurum kimi fəaliyyət göstərməsinə ehtiyac qalmır və onun səlahiyyətlərinin Maliyyə Nazirliyinə verilməsi daha məqsədəuyğundur”.

BAXCP İdarə Heyəti hesab edir ki, ölkədə aparılan struktur islahatları genişləndirilməli və idarəetmənin bütün sahələrini əhatə etməlidir: “İdarəetmədə səmərəliliyin artırılması, məmur özbaşınalığına son qoyulması, dövlət büdcəsindən idarəetmənin təşkilinə ayrılan vəsaitlərə qənaət edilməsi məqsədilə aparılan struktur islahatları çərçivəsində məmur ordusunun sayı azaldılmalı, ölkə ərazısi üzrə 8 və yaxud 9 bölgədə yerli dövlət hakimiyyəti və idarəetmə orqanları yaradılmalı, mövcud ərazi idarəetmə bölgüsü üzrə fəaliyyət göstərən bütün yerli dövlət hakimiyyəti və idarəetmə orqanlarının səlahiyyətləri xalqın seçdiyi yerli özünüidarəetmə orqanlarına - bələdiyyələrə verilməlidir”.

BAXCP İdarə Heyəti, islahatlar çərçivəsində, dövlət qulluğunda çalışan şəxslərin daha səmərəli fəaliyyət göstərmələri, korrupsiyaya zəmin yarada biləcək halların qarşısının alınması üçün onların əmək haqlarının dəfələrlə artırılmasını zəruri sayır.

Xəbər lenti

DAHA ÇOX XƏBƏR