Nida.az
Münhen platforması: Əliyevin bir il öncə və bir il sonrakı cavabı
“Erməni əsgərinin Ağdamda, Füzulidə nə işi
var?”
Prezident İlham Əliyevin ötən il keçirilən 51-ci Münhen Təhlükəsizlik Konfransında səsləndirdiyi bu fikirlər Dağlıq Qarabağ münaqişəsinin mahiyyəti və bu münaqişədə ədalət prinsipi barədə beynəlxalq ictimaiyyətə aydın təsəvvürlər təqdim etdi. Azərbaycan lideri İrəvan rejiminin işğalçı siyasətinin qurbanına çevrilən erməni əsgərinə doğru yolu göstəridi: “Əgər ölmək istəmirsə, onda qoy Ağdama getməsin, olduğu yerdə qalsın, İrəvanda, Gümrüdə, öz ölkəsində qalsın. Sizin özünüz üçün ölkənizdə kifayət qədər yeriniz var. Ermənistanda o qədər də çox insan qalmayıb. Sizin Ağdamda, Füzulidə nə işiniz var?”
Beynəlxalq ictimaiyyət qarşısında verilən bu mesaj həm Azərbaycanın
ərazi bütövlüyü məsələsində prinsipiallığını nümayiş etdirdi, həm
də dünya birliyinə real vəziyyəti açıqladı.
Bir il sonra Azərbaycan Prezidenti İlham Əliyev yenidən Almaniyada – 52-ci Münhen Təhlükəsizlik Konfransında çıxış etdi. Bu bir il ərzində çox şey dəyişib. Dəyişməyən yeganə şey işğalçı Ermənistanın mahiyyətidir. Sarkisyan rejimi yenə erməni əsgərini Ağdama, Füzuliyə, birbaşa ölümə doğru göndərir. Burada dünya ermənliyinin mahiyyəti və regional güclərin siyasi maraqları ilə yanaşı, Sarkisyanın öz hakimiyyətini qorumaq üçün məhz bu münaqişədən istifadə etməsi amili də rol oynamaqdadır.
Münhen Təhlükəsizlik Konfransının bu ilki toplantısı ötən ilki ilə
xeyli fərqləndi. Xüsusilə Suriya münaqişəsinin gərginləşməsi,
Türkiyə-Rusiya müharibəsi haqda qızğın müzakirələrin getdiyi,
İranla Səudiyyə Ərəbistanı münasibətlərinin açıq qarşıdurma
müstəvisinə keçdiyi bir vaxtda Münhen konfransının gündəliyi xeyli
zəngin oldu. Və çox maraqlıdır ki, Rusiya prezidenti Vladimir Putin
konfransda iştirak etmədi. Konfransda iştirak etməyən dövlət
rəhbərlərinin siyahısında Ermənistan prezidenti Serj Sarkisyanın da
adı var idi. O, alman torpaqlarına baş diplomatı Eduard Nalbandyanı
göndərmişdi.
Sarkisyandan fərqli olaraq, Azərbaycan liderinin konfransa dəvəti
ilk növbədə şəxsi nüfuz məsələsindən irəli gələn amildir. Eyni
zamanda, burada konfransa ev sahibliyi edən Almaniyanın Cənubi
Qafqaza dair geostrateji maraqlarının olması və bu bölgədə əsas güc
olaraq Azərbaycanı qəbul etməsi faktoru önəm daşıyır.
Prezident İlham ƏliyevinMünhen konfransına qatılması hər şeydən öncə enerji məsələləri baxımdan diqqətçəkən idi. Təsadüfi deyil ki, Azərbaycan lideri konfrans çərçivəsində məhz “İqlim və enerji təhlükəsizliyi” panelində çıxış etdi.
Bu, Avropanın enerji təhlükəsizliyində mühüm rol oynayan
Azərbaycanın geosiyasi əhəmiyyəti, eləcə də son dövrlər daha kəskin
hal alan “qaz müharibələri” kontekstində vacib amil idi. Hazırda
Avropanın qaz bazarı uğrunda ciddi rəqabət var. Rusiya qazından
imtina edən Brüssel əsas alternativ kimi Azərbaycan əsas müəllifi
olduğu “Cənub Qaz Dəhlizi” layihəsini önə çəkir. Bu layihənin
tərkib hissəsi olan TANAP və TAP boru xətlərinin çəkilişi sürətlə
aparılır və ən geci 2020-ci ildə Azərbaycan qazı Avropa bazarında
istehsalçılara çatdırılacaq. Lakin Prezident İlham Əliyev də bir
neçə dəfə TAP layihəsinə süni əngəllərin yaradıldığını ifadə edib.
Bu əngəllər Avropanın özündə, xüsusilə İtaliyada meydana çıxır,
müxtəlif enerji lobbiləri tərəfindən ekologiya kimi absurd
iddialarla Azərbaycan layihələrinin yolunda maneələr yaratmağa
cəhdlər edirlər.
Bununla yanaşı, sanksiyalardan azad olan İranın Avropa bazarına qaz
çıxarmaq istəklərinin gündəmə gəlməsi də Bakının Cənub Qaz Dəhlizi
layihəsinin əhəmiyyətini Avropanın diqqətinə bir daha çatdırmasını
şərtləndirdi. Azərbaycan lideri bu situasiyada iştirak etdiyi
platformadan istifadə edərək lazımi məqamlara toxundu.
“...Təhlükəsizlik istəyirsinizə, işğalı
dayandırın”
Və ən maraqlı məqam Prezident İlham Əliyevin Dağlıq Qarabağ
münaqişəsinə dair səsləndirdiyi fikirlər idi. Hansı ki, ötən il
məhz həmin platformada tarixə keçən sözləri söyləmişdi.
Ermənistan təxribatçı mahiyyətini Münhen platformasında da nümayiş
etdirdi. Belə ki, bu ölkənin Xarici İşlər Nazirliyinin nümayəndəsi
Azərbaycan liderinə spekulyativ sual ünvanladı və cavabını aldı.
Bu, həm də beynəlxalq ictimaiyyətə göndərilən mesaj idi.
“Ermənistanı nəinki biz, o cümlədən, dünyanın ən böyük beynəlxalq
qurumu olan BMT Təhlükəsizlik Şurası da ittiham edir. Bu qurum
Ermənistan qoşunlarının dərhal və qeyd-şərtsiz Azərbaycan
torpaqlarından çıxarılmasına dair 4 qətnamə qəbul edib. Biz erməni
xalqını deyil, Ermənistan hökumətini Xocalıda soyqırımı törətməkdə
ittiham edirik. Günahsız insanlar yalnız azərbaycanlı olduqları
üçün erməni bandaları tərəfindən qətlə yetirilib. Bu soyqırımı
dünyanın 10-dan çox ölkəsi tərəfindən qəbul olunub. Biz Ermənistanı
bir milyondan çox insanı qaçqın və məcburi köçkünə çevirməkdə
günahlandırırıq. Onlar öz torpaqlarında qaçqına çevriliblər. 40
mini Dağlıq Qarabağdan, 750 mini Azərbaycanın digər işğal olunmuş
ərazilərindən, 200 min azərbaycanlı isə Ermənistanda etnik
təmizləməyə məruz qalaraq, qaçqın və məcburi köçkün olub. Bütün
bunlar işğalın, sizin qonşu ölkəyə qarşı siyasətinizin nəticəsidir.
İşğal dayandırılmalıdır. Regionda təhlükəsizlik istəyirsinizsə,
işğalı dayandırın”, - deyə Prezident İlham Əliyev bir il sonra
ermənilərə doğru yolu göstərdi, həmçinin, beynəlxalq cəmiyyətə
regionda təhlükəsizliyin təmin olunması şərtləri ilə bağlı mesaj
verdi.
Asif Nərimanlı
-
Kriminal03:30
Sumqayıtda DƏHŞƏT: oğul ata-anasını qətlə yetirdi - YENİLƏNDİ
-
Magazin202:22
Məşhur model çimərlikdə çılpaq pozalar verdi - FOTO
-
Nəqliyyat01:00
ŞOK İDDİA: Dubayda su altında qalan avtomobillər Azərbaycana gətirilə bilər - VİDEO
-
Magazin100:45
“Səhvlərinizin əllərindən öpün”
-
MDB00:30
Azərbaycanlı milyarder Rusiyanın ən zəngin adamı oldu
-
Qoroskop00:15
Günün ULDUZ FALI: münasibətlər gərginləşə bilər
-
MDB18 Aprel 23:12
Bu ölkədə falçı və cadugərlərlə bağlı SƏRT QƏRAR VERİLƏCƏK
-
Magazin118 Aprel 22:48
Məşhur xanəndə ONLARI QINADI: "Bu saat necə gəldi geyinirlər" - FOTO