Sabiq millət vəkili Brüsseldə Sarkisyanı cani adlandırdı - FOTOLAR

Brüsseldə Xocalı soyqırımının 24-cü ildönümü münasibətilə aksiya keçirilib.

Publika.az xəbər verir ki, sabiq millət vəkili Baba Tağıyevin təşkilatçılığı ilə keçirilən aksiyada ermənilərin azərbaycanlılara qarşı törətdiyi vəhşiliklər pislənilib.

“26 fevral - Xocalı soyqırımı”, “Serj Sarkisyan, Robert Koçaryan, Boko Saakyan, Xocalıda törətdiklərinizə görə cavab verməlisiniz”, “Qarabağda qətliam” şüarları ilə keçirilən aksiyada çıxış edən B.Tağıyev bildirib ki, Xocalı soyqırımı bəşəriyyət tarixində qara ləkədir.

“Xocalı soyqırımı XX əsrin ən qanlı və dəhşətli faciələrindən biridir. 1992-ci il fevralın 25-dən 26-na keçən gecə Xocalıda 63-ü uşaq, 106-sı qadın, 70-i qoca olmaqla 613 nəfər amansızlıqla qətlə yetirildi. Dünya tarixi üçün qara ləkə olan bu soyqırımı bu gün Ermənistana rəhbərlik etmiş şəxslər, həmçinin, bu ölkənin hazırkı prezidenti Serj Sarkisyan törədib. Onlar cavab verməlidir”, - deyə B. Tağıyev aksiyada elan edib.

Daha sonra Brüssel sakinlərinə Xocalı soyqırımı, həmçinin, Ermənistanın işğalçı siyasəti və Azərbaycanın işğal olunmuş Dağlıq Qarabağ və digər rayonlarında törədilən vandalizm haqda məlumatların çap olunduğu bukletlər paylanılıb.

Asif