Vaşinqtonda Qarabağ təxribatı: Nüvə sammitində Bakını nə gözləyir?

Azərbaycan Prezidenti İlham Əliyevin Vaşinqtonda keçirilən nüvə təhlükəsizlik konfransında iştirakı öncəsi ABŞ-dakı erməni lobbisi və ona bağlı konqresmenlər Qarabağ təxribatına əl atıblar.

Publika.az xarici mediaya istinadən xəbər verir ki, Konqresin bəzi üzvləri prezident Barak Obamaya müraciət edərək, Dağlıq Qarabağla bağlı Roys-Engel ideyasını qəbul etməsi üçün onun Azərbaycan Prezidenti ilə danışıq aparmasına çağırış ediblər.

“Biz Ermənistanın və DQR-in (Qarabağda yaradılan qondarma rejim nəzərdə tutulur – red.) dünya sülhünə dəstəyini salamlayırıq və ümid edirik ki, Azərbaycan öz etirazlarını təkrar gözdən keçirəcək. Sizi nüvə təhlükəsizlik sammiti çərçivəsində Qarabağ münaqişəsi üzrə administrasiyanız tərəfindən bəyənilən Roys-Engel ideyasını münaqişə tərəfləri ilə müzakirə etməyə çağırırıq”, - deyə konqresmenlər Ed Roys və Bred Şermanın müəllifi olduğu müraciətdə deyilir.

Məlumata görə, müraciəti Konqresin 54 üzvü imzalayıb.

Qeyd edək ki, müraciətin müəllifləri olan Ed Roys və Bred Şerman ABŞ-da ermənipərəst mövqeləri ilə məşhurdur. Misal üçün, B. Şerman qondarma “erməni soyqırımı”nın tanınması üçün Konqresə təqdim olunan qanun layihəsinin müəlliflərindən biridir. Həmin qanun layihəsinin altında E. Roysun da imzası var.

E. Roys ABŞ-da Amerika Erməni Milli Komitəsi (ANCA) tərəfindən bir neçə il öncə yaradılan Ermənistana dəstək qrupunun həmsədri olub. Respublikaçı konqresmen Roys həmçinin, uzun illər “Türkiyədə müsadirə olunmuş xristian kilsələrinin və digər əmlakların geri qaytarılması”na çağırışlar edərək, “erməni soyqırımı”nı tanıtmaq cəhdləri edib. O, eyni zamanda 1992-ci ildə “Azadlığa dəstək akt”na edilən və Azərbaycanı federal yardım alan ölkələrin siyahısından təcrid edən 907-ci düzəlişin saxlanılmasının tərəfdarıdır. Onu da bildirək ki, Roys Konqresdə ABŞ-da ermənilərin kompakt yaşadığı Kaliforniya ştatını təmsil edir.

Qarabağ münaqişəsi ilə bağlı Roys-Engel ideyasının həmmüəllifi Eliot Engel də erməni lobbisinin ən fəal nümayəndələrindəndir. Konqresdə müzakirələr zamanı dəfələrlə qondarma “erməni soyqırımı” ilə bağlı məsələ qaldıran Engel Roysla eyni siyasi mövqeyi bölüşür. Ermənistan KİV-nin yaydığı məlumatlara görə, Engel 2011-ci ilin martında Amerikanın Erməni Assambleyasında Türkiyənin İsrailə qarşı düşmən münasibətindən danışaraq, Ankaranı üzr istəməyə çağırıb, həmçinin, 1915-ci il hadisələrinə görə Türkiyəni ermənilərdən üzr istəməyə razı salmağın vacibliyini diqqətə çatdırıb.

Bu şəxslərin Dağlıq Qarabağ münaqişəsi ilə bağlı irəli sürdüyü ideya da təbii ki, birbaşa Ermənistanın mövqeyinə xidmət edir.

Roys-Engel ideyası

Bu ideyaya görə, qoşunların təmas xəttində snayperlər geri çəkilir, təmas xətti boyunca hücumların mənbəyini müəyyənləşdirmək üçün müasir atəş lokatorları və səs avadanlıqları yerləşdirilir, atəşkəs rejiminin pozulması ilə bağlı nəzarəti yaxşılaşdırmaq üçün təmas xəttinə ATƏT-in əlavə müşahidəçiləri cəlb edilir.

Bu ideyanın qəbul edilməsi hər şeydən öncə Ermənistana sərf edir. Rəsmi Bakı da dəfələrlə bəyan edib ki, bu ideyaların məqsədi Ermənistanın işğalçı siyasətini davam etdirməsi üçün münbit şəraitin yaradılması məqsədi daşıyır.

Bu ideya qəbul olunarsa...?

Atəşkəsə nəzarət mexanizmi beynəlxalq ictimaiyyətin diqqətini Qarabağ münaqişəsindən yayındıracaq. Bu da münaqişənin “dondurulmuş” vəziyyətdə qalması deməkdir və beləliklə, Ermənistan işğalçı siyasətini davam etdirəcək.

Həmçinin, belə bir mexanizmin Azərbaycanın Dağlıq Qarabağöda status-kvonun dəyişməsi üçün apardığı siyasətə ziddir.

Göründüyü kimi, erməni lobbisi Azərbaycan Prezidentinin Vaşinqtona səfərindən istifadə edərək, Qarabağ təxribatını həyata keçirmək istəyirlər.

Asif Nərimanlı