Əli Həsənov: “Ermənistan çağırışlara məhəl qoymur”
Bizi izləyin

Nida.az

Əli Həsənov: “Ermənistan çağırışlara məhəl qoymur”

“Hazırda Azərbaycan Ordusu birtərəfli qaydada ATƏT-in Minsk Qrupunun həmsədrlərinin, o cümlədən Minsk Qrupuna həmsədr olan ölkələrin və digər beynəlxalq təşkilatların müraciətlərini nəzərə alaraq, aktiv hərbi əməliyyatları dayandırıb, öz mövqelərini möhkəmlədərək atəşkəs rejiminə əməl edir. Sadəcə, silahlı qüvvələrimiz ermənilərin hələ də davam edən hücum cəhdlərindən müdafiə olunur və lazımi cavab verir".

Publika.az xəbər verir ki, bunu APA-ya müsahibəsində Azərbaycan prezidentinin ictimai-siyasi məsələlər üzrə köməkçisi Əli Həsənov deyib.

Ə. Həsənov bildirib ki, aprelin 2-də Ermənistanın Azərbaycan ordusunun mövqelərini, ətraf kəndləri, qaçqın düşərgələrini intensiv atəşə tutmasına cavab olaraq silahlı qüvvələrimiz hücuma keçmiş və vacib, strateji əhəmiyyət kəsb edən yüksəkliklərə nəzarəti ələ keçirmişdir. Hazırda isə ordumuz fəal hərbi əməliyyatları dayandırıb, yalnız müdafiə tədbirləri görür: "Amma ermənilər hələ də Azərbaycan mövqelərinə hücum edir, hətta bəzən daha intensiv şəkildə, bütün növ silahlardan atəş açırlar. Bu da onu göstərir ki, Ermənistan beynəlxalq təşkilatların, o cümlədən ATƏT-in Minsk Qrupunun çağırışlarına məhəl qoymur, mövcud qarşıdurmanı davam etdirmək istəyir".

Ə. Həsənovun sözlərinə görə, prezident İlham Əliyevin rəhbərliyi ilə keçirilmiş Təhlükəsizlik Şurasının iclasında da vurğulanıb ki, Ermənistan növbəti dəfə təxribata əl atıb və bu təxribat cəbhə bölgələrində silahlı qarşıdurmaya şərait yaradıb: "Azərbaycan ordusu müdafiə olunub, sonra da əks-hücuma keçərək bu təxribata kifayət qədər layiqli cavab verib. Azərbaycan ordusu bu gün işğal altındakı əraziləri azad etmək iqtidarındadır. Bu reallığı biz davamlı olaraq təxribatçı Ermənistana nümayiş etdirmişik və gələcəkdə də nümayiş etdirəcəyik. Azərbaycan bütün lazımi tədbirləri görməklə bərabər, ATƏT çərçivəsində danışıqların bərpa olunmasına və məsələnin sülh yolu ilə həllinə hazırdır".

Prezidentin köməkçisi onu da bildirib ki, Azərbaycan son proseslərlə bağlı həm beynəlxalq medianın, həm də sosial şəbəkə istifadəçilərinin obyektiv məlumat alması üçün zəruri tədbirlər görür: "Biz Azərbaycanın mövqeyi, baş vermiş hadisələrin təfsilatı ilə bağlı lazımi informasiyaları hər yerə çatdırırıq. Biz ermənilərin həm cəbhədəki, həm də informasiya məkanındakı təxribatına layiqli cavab veririk”.

Oxumağa davam et
Reklam
Reklam

Gündəm