Nida.az
24 illik uğur formulu
Tarixin səhifələrində elə hadisələr əbədiləşib ki, onlar təkcə keçmiş kimi əlamətdar deyil. Bugünün reallıqları da o hadisələrin təməli üzərində qərar tutur. Onlar dünəndən bu günə bələdçilik etdiyi kimi, bugündən də gələcəyə doğru aydın istiqamət verir.
Həyatımızın hər anı bir hadisədir əslində... Amma bunlar,
olsa-olsa, bizim ömrümüzün anlarıdır. Xalqın, dövlətin tarixinə isə
elə hadisələr yazılır ki, onun mərkəzində insanların taleyində
böyük rolu olmuş tarixi şəxsiyyət dayansın. Zaman keçdikcə o
şəxsiyyətin böyüklüyü, ucalığı bu hadisələrin mahiyyətini daha da
gücləndirsin, ona yeni dəyərlər qatsın...
***
Bu sətirlər 21 noyabra bir neçə gün qalmış, Yeni Azərbaycan
Partiyasının təsis olunmasının 24-cü ildönümü ərəfəsində qələmə
alınır. Düşüncələrimizdə bir anlıq 24 il əvvələ qayıdıb o çətin və
keşməkeşli illərdəki siyasi mühiti xatırlayırıq.
Qəribə vəziyyət yaranmışdı. Uzun illər təkpartiyalı sistem
şəraitində yaşamış insanlar müstəqilliyin ilk illərində qəzetlər
kimi, partiyaların da bolluğuna düşmüşdülər. Bir çoxları öz
gələcəyini partiya yaradıb siyasi meydana atılmaqda görürdü. Necə
deyərlər, hərə bir partiya yaradırdı.
Politologiya elmi nöqteyi-nəzərindən yanaşsaq, insanların partiya
fəaliyyətinə bu güclü marağını təbii saymaq olardı. Çünki hər bir
sivil cəmiyyətdə geniş əhali kütlələrinin, ümumən cəmiyyət
üzvlərinin ictimai-siyasi həyatda iştirakı məhz partiyalar
vasitəsilə reallaşır. Fərdlər ayrı-ayrı siyasi qurumlarda
birləşərək konkret məqsəd və vəzifələri, müəyyən konsepsiya və
ideologiyanı həyata keçirməyə çalışırlar. Amma indiyə qədər
dünyanın müxtəlif ölkələrində fəaliyyət göstərmiş siyasi
partiyaların tarixi həm də onu göstərir ki, xalq və dövlət
maraqlarını özünün praktik fəaliyyətində ifadə etməyən
təşkilatların mövcudluğu çox da uzun çəkə bilməz. Cəmiyyətin
ayrılıqda götürülmüş bir təbəqəsinin və yaxud sosial qrupunun
mənafe və maraqlarını qoruyan siyasi təşkilatın, həmçinin ictimai
qurumun xalqı, milləti daim öz arxasınca apara bilməsi də heç zaman
mümkün deyildir. Ən önəmlisi isə partiyaların taleyi ona rəhbərlik
edən liderin şəxsiyyətindən, xalq və dövlət maraqlarına
bağlılığından, öz ideyalarına sadiqliyindən çox asılıdır.
Ona görə də müstəqilliyin ilk illərində hadisələri dərindən təhlil
etməyi bacaran insanlara əyan idi ki, cılız firqə maraqlarını
aktuallaşdıran, cəmiyyətdə xaotik bir siyasi əhval yaradan bu
partiyalar bolluğu uzun sürməyəcək. İdeoloji-siyasi kursu
bütövlükdə cəmiyyətin maraqlarına cavab verən sağlam bir qüvvə
siyasi meydana çıxan kimi böyük əksəriyyətin dəstəyi ilə monolit
qüvvəyə çevriləcək və müxtəlif dəbdəbəli adlar, cəlbedici
proqramlar, şüarlar irəli sürən, xalqı, ölkəni irəli aparacaqlarını
vəd edən digər firqələr xalqın bu böyük gücü qarşısında yavaş-yavaş
meydanı tərk etməli olacaqlar.
Yeni Azərbaycan Partiyasının yaradılması təşəbbüsü ilə 1992-ci ilin
oktyabrında ulu öndər Heydər Əliyevə üz tutmuş 91 nəfər Azərbaycan
ziyalısının məşhur müraciətində də elə bu xüsusda yazılırdı:
“Azərbaycanda “sürətli artım” ancaq yeni-yeni partiyaların və
onların liderlərinin meydana çıxması sayəsindədir. Bu siyasi
partiyaların sayı gündən-günə çoxalsa da, respublikada
ictimai-siyasi həmrəylik yaratmaq yolunda əməli iş görülmür, siyasi
vakuum mövcuddur. Çünki bu siyasi partiyaların rəhbərləri arasında
sözün əsl mənasında geniş xalq kütləsinin dərin inam və etimadını
qazanmış, müxtəlif zümrələrdən olan adamları birləşdirə biləcək
beynəlxalq nüfuzlu və respublika həyatının bütün sahələrindən tam,
geniş məlumatı olan güclü lider yoxdur”.
***
İstər ədəbiyyat tarixi olsun, istər mədəniyyət, istər siyasət -
fərq etməz, diqqət etsək görərik ki, hər hansı xalqın tarixində
ortaya çıxan ən mütərəqqi yenilikləri, baş verən ən önəmli
hadisələri zaman özü yaradır, dövr özü ərsəyə gətirir.
21 noyabr 1992-ci il də Azərbaycan tarixinin belə
səhifələrindəndir. O zaman Naxçıvana - Yeni Azərbaycan Partiyasının
təsis konfransına, sonralar Şəki Şəhər İcra Hakimiyyətinin başçısı
təyin edilmiş Nəzir Əhmədovla getmişdik. Qaldığımız mehmanxanada
işıq, su belə yox idi. Bizim üçün əlindən gələni əsirgəməyən
Naxçıvan və Azərbaycan Ali Sovetinin deputatı Eldar İbrahimovun
gətirdiyi “Badamlı” suyu ilə əl-üzümüzü yuduq.
Bəli, Yeni Azərbaycan Partiyasının yaradıcı qüvvəsi belə bir ağır
zaman kəsiyində Naxçıvanda qərar tutmuşdu. Həmin noyabr günü
partiyanın təsis konfransında iştirak üçün Naxçıvandakı Cəlil
Məmmədquluzadə adına Dram Teatrının soyuq zalına toplaşmış
ziyalıları, həmçinin ölkənin ayrı-ayrı bölgələrindən gəlib
toplantıda iştirak edə bilməsə də, qəlbi bu zalda döyünən insanları
birləşdirən zamanın səsi idi, dövrün çağırışları idi.
Bu çağırış 91-lərin Heydər Əliyevə müraciətində öz əksini belə
tapmışdı: “Uzun illər əldə etdiyiniz dövlət quruculuğu
təcrübələrinizə əsaslanaraq Siz
qısa müddətdə Azərbaycanda geniş xalq kütləsini əhatə eləyəcək çox
böyük, güclü, nüfuzlu və işlək bir partiya yaratmağa qadirsiniz.
Buna görə də Azərbaycanın, demək olar ki, bütün bölgələrində
aparılan ictimai rəy sorğularının nəticələrinə və bizim təşkilat
komitəsinə daxil olan minlərlə şifahi və yazılı vətəndaş
təkliflərinə əsaslanaraq belə bir qənaətə gəlirik ki, yaratmaq
istədiyimiz Yeni Azərbaycan Partiyasına bu gün rəhbərlik etməyə
qadir olan yeganə mütləq lider Siz ola bilərsiniz və ya yalnız bu
halda yaranmaqda olan partiya öz qarşısına qoyduğu məqsədə çatar,
respublikanın bütün zümrələrdən olan xalq kütləsini öz ətrafında
birləşdirərək Azərbaycanın siyasi, iqtisadi həyatında mövcud olan
boşluğu doldurar, dövlət quruculuğu işlərində öz layiqli töhfəsini
verə bilər”.
***
Beləliklə, zaman öz səsi ilə insanları Azərbaycanı müstəqilliyin
ilk illərində üzləşdiyi bəlalardan xilas edib aydın inkişaf yoluna
çıxara biləcək yeganə liderin - Heydər Əliyevin ətrafında bir araya
toplayırdı.
Ona görə Yeni Azərbaycan Partiyasının qeydiyyat sənədlərində təsbit
olunmayan bir adı da “Heydər Əliyev partiyası” oldu. Baxmayaraq ki,
ümummilli liderin öz çıxışlarında, müsahibələrində dəfələrlə qeyd
etdiyi kimi, siyasi partiya yaradıb ona rəhbərlik etmək arzusunda
deyildi, bununla belə, xalqın istəyinə qarşı çıxmadı və onun adı
ilə assosiasiya olunması bu partiyanın uğurlarında çox böyük rol
oynadı.
***
Heydər Əliyevin ziyalıların o müraciətinə cavabını tapıb təkrar
oxuyuram. Bir liderin müstəqilliyini yenicə əldə edib naşı
idarəçilər əlində saysız-hesabsız problemlərlə üzləşən, gündən-günə
xaosa sürüklənən, parçalanaraq dünya xəritəsindən silinmə təhlükəsi
ilə üz-üzə qalan ölkənin problemlərini bu qədər dəqiqliklə
ümumiləşdirə bilməsinə və bu problemlərdən xilas yollarına işıq
salan fəhminə sadəcə olaraq heyrətlənirəm.
Heydər Əliyev Azərbaycan Respublikasının dövlət müstəqilliyi əldə
etməsini tarixi bir hadisə, zamanın, taleyin xalqımıza əvəzsiz bir
töhfəsi kimi qiymətləndirir, bu hadisənin bütün azərbaycanlıları
sevindirdiyi qədər müstəqil Azərbaycan dövləti və xalqı qarşısında
çox məsul, mürəkkəb, çətin vəzifələr qoyduğunu göstərirdi: “İndi
əsas vəzifə dövlətçiliyin, müstəqilliyin bərqərar olunmasını,
milli-demokratik dövlətin formalaşmasını, müstəqil Azərbaycanın
suverenliyini, təhlükəsizliyini təmin etmək və vətəndaşlara azad,
xoşbəxt, firavan həyat şəraiti yaratmaqdan ibarətdir. Bu xeyirxah
və şərəfli işə hər bir vətənpərvər öz layiqli töhfəsini
verməlidir”.
Ulu öndər qeyd edirdi ki, Azərbaycanın dövlət müstəqilliyinin
möhkəmləndirilməsi, milli-demokratik dövlətin, hüquqi cəmiyyətin
yaradılması bütün ictimai-siyasi, sosial-iqtisadi potensialdan
maksimum istifadə olunmasını tələb edir. Əgər hər hansı ölkənin
xalqları öz hüquqlarını anlayır və onları qoruya bilirsə, o zaman
ən kiçik dövlət belə ən böyük məmləkət qədər güclü olur. Heydər
Əliyev bu məqsədlə görüləsi işləri ardıcıllıqla sıralayır, ilk
növbədə Azərbaycanın müharibə vəziyyətindən çıxması zərurətini
irəli sürürdü.
Onun qarşıya qoyduğu digər məsələ isə Azərbaycanda sosial-iqtisadi
böhranın aradan qaldırılması, xalqın güzəranının yaxşılaşdırılması
üçün ölkəmizin tükənməz təbii sərvətlərindən, zəngin sənaye, aqrar
və sosial ehtiyatlarından, lazımi intellektual potensialından,
əsaslı istehsal fondlarından, işçi qüvvəsindən respublikanın
müstəqilliyinin möhkəmləndirilməsi və insanların həyat səviyyəsinin
yaxşılaşdırılması üçün səmərəli istifadə olunması idi.
Heydər Əliyev ziyalıların müraciətinə cavabında haqlı olaraq kadr
məsələlərinə də toxunur, AXC-Müsavat cütlüyünün bolşeviklərin və
kommunistlərin özünü doğrultmayan kadr təcrübələrindən yenidən
istifadə etməsinin yolverilməzliyini bildirir, ötən onilliklər
ərzində respublikada hazırlanmış kifayət qədər bilikli, təcrübəli,
səriştəli, yüksək mədəniyyətə malik kadrların ictimai-siyasi
təşkilatlara, partiyalara mənsubiyyətindən asılı olmayaraq fəal
quruculuğa cəlb edilməsinin zəruriliyini göstərirdi.
Ümummilli lider eyni zamanda qeyd edirdi ki, müstəqil Azərbaycanın
dövlətçiliyinin möhkəmlənməsi, hər şeydən əvvəl, respublikada
qanunların toxunulmazlığından, qanunun aliliyindən asılıdır.
Totalitarizmdən tamamilə xilas olmaq yalnız demokratiyanın ardıcıl
inkişafı, siyasi plüralizm, insan azadlığı şəraitində mümkündür.
Söhbət söz, vicdan, din, təşəbbüskarlıq və sahibkarlıq,
mülkiyyətçilik, seçib-seçilmək azadlığından gedir.
Azərbaycanda yaşayan hər bir vətəndaş milliyyətindən, dinindən,
dilindən, siyasi əqidəsindən asılı olmayaraq, bu demokratik
azadlıqlara və hüquqlara malik olmalıdır. Yeni müstəqil dövlətin
quruculuğu prosesinə vətəndaşların hamısı, əhalinin bütün
təbəqələri cəlb olunmalıdır. Yeni müstəqil Azərbaycan bütün
Azərbaycan xalqınındır. Hamı onun tərəqqisinə çalışmalıdır. Bu işdə
heç kəsə məhdudiyyət qoyulmamalıdır.
O illərdə Azərbaycanın parçalanmasına yönəldilmiş meyillərin
doğurduğu böyük təhlükələr də Heydər Əliyevin narahatlıqla
toxunduğu əsas məsələlərdən idi. Böyük dövlət adamı belə meyillərin
qarşısının qətiyyətlə alınmasını, yaranan problemlərin sivil və
demokratik yollarla həllini zəruri sayırdı. Qeyd edirdi ki,
Azərbaycan onilliklərlə, yüzilliklərlə onun ərazisində yaşayan
bütün insanların vətəni olmuşdur. Yaranmış vahid, bütöv
Azərbaycanın demokratik prinsiplər əsasında qorunub saxlanılması və
inkişaf etdirilməsi, müstəqil Azərbaycan dövlətinin
möhkəmləndirilməsi üçün mühüm vəzifə və əsas şərtdir.
“Azərbaycanın bugünkü həyatı və gələcək taleyinə dair digər
problemlər də məni narahat edir. Lakin Sizin müraciətinizə cavab
verərkən yuxarıda göstərilən məsələlərə daha öncə diqqət yetirməyi
lazım bilirəm. Zənnimcə, onların ən qısa müddətdə həlli müstəqil
Azərbaycan dövləti üçün son dərəcə vacibdir. Azərbaycanın çağdaş və
gələcək taleyi ilə bağlı bu problemlərinə biganə qalmağa heç kəsin
haqqı yoxdur.
Güman edirəm ki, müstəqil Azərbaycan dövlətinin gələcək həyatının
və fəaliyyətinin əsasını təşkil edən demokratiya və siyasi
plüralizm şəraitində Sizin müraciətinizdə göstərilən yeni
Azərbaycan siyasi partiyasının yaradılması obyektiv zəruriyyətdən
doğulur.
Belə partiya Azərbaycanın ictimai-siyasi həyatında fəal iştirak
edərək, yeni müstəqil Azərbaycan dövlətinin möhkəmləndirilməsində
və inkişafında tarixi rol oynaya bilər. Əgər belə partiya
yaradılarsa, onun fəaliyyətində fəal iştirak etməyə hazıram”.
***
Belə bir partiya Heydər Əliyevin rəhbərliyi ilə yaradıldı. Yeni
Azərbaycan Partiyasının təsis olunmasından qısa müddət sonra isə
tarixi taleyimizin digər mühüm hadisəsi baş verdi. Ulu öndər xalqın
təkidli tələbi ilə hakimiyyətə qayıdaraq partiya işindən əlavə
böyük bir məsuliyyəti - Azərbaycanın ağır dövründə ölkəyə rəhbərlik
missiyasını üzərinə götürdü. Bu 24 il müddətində dövlət
təsisatlarının gördüyü işlərlə Yeni Azərbaycan Partiyasının
fəaliyyətinin ayrılmaz vəhdəti müstəqil Azərbaycan dövlətinin
inkişafına qapı açdı.
Bu gün tarixinin ən qüdrətli mərhələsini yaşayan Azərbaycandakı
inkişaf reallıqlarını məhz bu vəhdət şərtləndirdi. Ümummilli
liderin ölkə rəhbərliyinə qayıdışı ilə Onun Yeni Azərbaycan
Partiyasının təsis olunması ərəfəsində cəmiyyət qarşısında
aktuallaşdırdığı məsələlərin hər biri ardıcıllıqla öz həllini
tapmağa başladı.
İlk növbədə, cəbhə bölgəsində atəşkəs elan olundu. Bu isə insan
itkilərini, qan-qadanı, cəmiyyətdəki müharibə kabusunu, hərbi
müxalifətin doğurduğu təhdidləri aradan qaldırmaqla yanaşı,
Azərbaycana qısa zamanda toparlanıb ictimai-siyasi sabitlik
mühitində strateji inkişaf kursunu müəyyən edərək addım-addım
həyata keçirməyə imkan yaratdı. Dövlət müstəqilliyimizin
möhkəmləndirilməsi, ölkənin sosial-iqtisadi inkişafı, Azərbaycanın
malik olduğu təbii resurslardan milli maraqlarımıza uyğun istifadə,
əhalinin güzəranının yaxşılaşması istiqamətində məqsədyönlü
addımlar atıldı. Dünyanın aparıcı neft şirkətləri ilə imzalanmış
“Əsrin müqaviləsi” ilə Azərbaycan qlobal layihələrin əsas
iştirakçılarından birinə çevrildi.
1995-ci ildə müstəqil Azərbaycan Respublikasının ilk
Konstitusiyasının qəbulu ilə ölkəmizdə hüquqi dövlət quruculuğunun
əsası qoyuldu. Demokratik islahatlar, ordu quruculuğu uğurla həyata
keçirildi. Azərbaycana töhfə verə biləcək bütün peşəkar, yüksək
potensiallı kadrlar ölkəmizin inkişafı proseslərinə cəlb edildi.
Qanunun aliliyi, vətəndaşların hüquq və azadlıqları təmin olundu,
azadlıqların anarxiyaya çevrilməməsi, demokratik prinsiplərin
ziyanlı məqsədlərlə istifadə olunmaması üçün cəmiyyətdə sosial
məsuliyyət normaları müəyyənləşdi. Müvəqqəti hakimiyyətlər dövründə
ölkənin müxtəlif bölgələrində zəhərli alaq otu kimi boy göstərməyə
başlayan separatizm meyillərinin qarşısı alındı.
Heydər Əliyevin irəli sürdüyü və Yeni Azərbaycan Partiyasının geniş
kütlələr arasında yayılmasında, təbliğində böyük rol oynadığı
azərbaycançılıq ideologiyası cəmiyyətdə müstəqil dövlətimizin
milliyyətindən, dinindən, dilindən, siyasi əqidəsindən asılı
olmayaraq özünü bu torpaqlara bağlı sayan, Azərbaycanı özünə tarixi
vətən bilən hər kəsə aidliyi məfkurəsini formalaşdırdı.
Əsas ideoloji dayaqları ölkəmizin müstəqilliyindən,
azərbaycançılıqdan, müasirlikdən, inkişafdan, sosial rifahdan,
iqtisadi və siyasi islahatlardan ibarət olan Yeni Azərbaycan
Partiyası da Heydər Əliyevin milli dövlətçilik kursunun ifadəçisi
olaraq bütün bu proseslərdə tarixi rol oynadı.
***
Partiyanın 2013-cü ilin 7 iyununda keçirilən V qurultayında
Azərbaycan Respublikasının Prezidenti, Yeni Azərbaycan Partiyasının
sədri cənab İlham Əliyev demişdir: “Ulu öndər Heydər Əliyevin
Azərbaycanda Prezident kimi fəaliyyəti Yeni Azərbaycan Partiyasının
güclü dəstəyi ilə tamamlanırdı. Heydər Əliyev və Yeni Azərbaycan
Partiyası bizim siyasi xəttimizdir. Heydər Əliyev Yeni Azərbaycan
Partiyasının, müstəqil Azərbaycan dövlətinin qurucusudur”. Bu
mənada partiyanın tarixi Azərbaycanda müstəqillik dövlət quruculuğu
tarixi ilə üst-üstə düşür.
17 oktyabr 2016-cı ildə Azərbaycanın dövlət müstəqilliyinin
bərpasının 25-ci ildönümünə həsr olunmuş rəsmi qəbulda isə
Prezident müasir Azərbaycanda siyasi sistemin formalaşmasında Yeni
Azərbaycan Partiyasının yerini və rolunu xüsusi vurğulayaraq bu
qurumun fəaliyyətinə tarixi qiymət verdi. Dövlət rəhbərinin
çıxışının ən maraqlı məqamlarından biri də müstəqillik tariximizin
dövrlər üzrə dəqiq təsnifatının aparılması və xalqımızın keçdiyi
tarixi təkamül yolunun bu həqiqətin aynasında aydın şəkildə öz
əksini tapması idi. Prezident İlham Əliyev müstəqilliyimizin
1991-ci ilin oktyabrından 1992-ci ilin yay aylarına qədər olan
dövrünü itirilmiş imkanlar, itki və faciələr dövrü kimi xarakterizə
etdi. Bu dövrün 1992-ci ilin yay aylarından 1993-cü ilin iyun ayına
qədər, daha çox AXC-Müsavat cütlüyünün hakimiyyəti dövrü kimi
xatırladığımız ikinci mərhələsini tam haqlı olaraq biabırçılıq,
rüsvayçılıq, fəlakət dövrü adlandırdı.
Ulu öndər Heydər Əliyevin hakimiyyət rəhbərliyinə qayıdışından
sonra Azərbaycanın daxil olduğu inkişaf və sabitlik mərhələsinin
müstəqillik tariximizin ikinci dövrü kimi layiqli qiymətini verdi.
Eyni zamanda, 2003-cü ildən bəri yaşadığımız nailiyyət və qürur
dolu illərin milli dövlətçilik tariximizdəki əhəmiyyəti də dövlət
rəhbərimizin çıxışında dəqiqliklə öz əksini tapdı: “2003-cü il,
hesab edirəm ki, müstəqil tariximiz üçün xüsusi əhəmiyyət daşıyır.
Çünki 2003-cü ildə ölkənin bundan sonra hansı yolla gedəcəyi
haqqında Azərbaycan xalqı öz qərarını verdi: Heydər Əliyev
siyasətimi davam edəcək, yoxsa ki, yenə Azərbaycan bəlalarla,
fəlakətlərlə üzləşəcək?! Azərbaycan xalqı həmişə olduğu kimi,
müdrikliyini göstərərək Heydər Əliyev siyasətinə öz səsini verdi.
...Bugünkü Azərbaycan reallıqları onu göstərir ki, yenə də
Azərbaycan xalqı düzgün seçim etmişdir. 2003-cü ildən bu günə qədər
Azərbaycanda sürətli inkişaf dövrü yaşanır, Heydər Əliyev siyasəti
davam etdirilir. Bu, müstəqilliyimizin üçüncü dövrüdür. Bu üçüncü
dövr ikinci dövrün məntiqi davamıdır”.
***
Bu illər ərzində qazandığımız tarixi uğurlar cild-cild
tədqiqatların mövzusudur. Azərbaycan cəmi 25 il əvvəl
saysız-hesabsız problemlər məngənəsində sıxılan, bir tərəfdən
daxildəki qaragüruhçuların səriştəsizliyindən, bir tərəfdən də
xarici təhdidlərdən kövrək müstəqilliyini hər an itirmə təhlükəsi
ilə üzləşən ölkədən bu gün dünyanın ən sabit, yüksək inkişaf
tempinə malik, özü öz taleyinin sahibi olan ölkəsinə çevrilib.
2003-cü ildən bəri Azərbaycan misilsiz inkişaf yolu keçib və bu
inkişaf xətti indi də davam etdirilir. Ölkədə işsizlik, yoxsulluq
kimi ağır sosial problemlər, demək olar ki, həllini tapıb. Keçid
dövrünü uğurla başa vurmuş cəmiyyətimizdə demokratik normalar,
bazar iqtisadiyyatının prinsipləri tam bərqərar olub. İnsanların
güzəranı düzəlib. Eyni zamanda, hər kəsə bacarığını, imkanlarını
ortaya qoyaraq öz işini qurub daha çox qazanmaq, daha yaxşı yaşamaq
üçün bərabər imkanlar təmin edilib.
Azərbaycanın regionlarında həyat büsbütün dəyişib. Ölkəmizin
sərvətlərinin yüz illərlə sümürülüb qəsb edildiyi vaxtlarda abad
yola, elektrik enerjisinə, təmiz suya, mavi yanacağa, normal
məktəbə, uşaq bağçasına, xəstəxanaya, idman obyektlərinə həsrət
rayonlarımızda, kəndlərimizdə indi hər cür şərait yaradılıb. Bütün
bunlar ulu öndər Heydər Əliyevin memarı olduğu, Azərbaycan
Prezidenti cənab İlham Əliyevin isə daha da möhkəmləndirdiyi dövlət
müstəqilliyimizin nailiyyətləridir.
Azərbaycan bu gün dünyanın nüfuzlu təşkilatlarının həlledici
üzvlərindəndir. Regionda reallaşdırılan bir çox qlobal layihələr
bilavasitə ölkəmizin qərarlarından, təşəbbüslərindən, iştirakından
asılıdır. Beynəlxalq arenalarda Azərbaycanın mövqeyi ilə hər zaman
hesablaşırlar. Əgər bu, bir tərəfdən Azərbaycan Respublikasının
Prezidenti cənab İlham Əliyevin qətiyyətindən irəli gəlirsə, digər
tərəfdən də Azərbaycanın kimsənin mənafeyinə toxunmayan, amma
ölkəmizin milli maraqlarını da heç kimə güzəştə getməyən haqq
mövqeyinə hörmətin təzahürüdür.
Azərbaycanda ciddi islahatlar aparılır, rəqabətqabiliyyətli,
ixracyönümlü, çoxşaxəli, innovativ iqtisadiyyatın
formalaşdırılması, sənayeləşmə siyasətinin sürətləndirilməsi,
mütərəqqi təcrübəyə əsaslanan sənaye zonalarının yaradılması,
müəssisələrin texnoloji cəhətdən yeniləşdirilməsi, intensiv
metodların tətbiqinin daha da genişləndirilməsi istiqamətində böyük
işlər görülür. Korrupsiya, rüşvətxorluq kimi inkişafımızı
əngəlləyən bəlaların kökünü kəsmək üçün ardıcıl tədbirlər həyata
keçirilir. Bu istiqamətdə atılmış addımların ilkin parlaq
nəticələri göz qabağındadır. Məsələn, artıq bütün dünyada məşhur
bir Azərbaycan brendi kimi tanınan “ASAN xidmət” brendinin cəmiyyət
həyatında səbəb olduğu böyük dəyişiklikləri, insanlarımız üçün
yaratdığı yeni dəyərləri kim inkar edə bilər? Bu, Azərbaycanın
dünyaya təqdim və ixrac etdiyi, artıq bir çox ölkələrin də istifadə
etmək üçün öyrəndiyi intellektual məhsuldur. Azərbaycan
Prezidentinin ortaya qoyduğu siyasi iradə, verdiyi mütərəqqi
qərarlar, ölkə həyatında tətbiq etdiyi innovativ yeniliklərlə
ölkəmizin üzünü bütün dünyada ağ edən bu cür nümunəvi
məhsullarımızın sırası hələ genişlənəcəkdir.
***
Müstəqil dövlətimizlə həmahəng, bu müqəddəs dəyərin yol yoldaşı,
milli ideallarımızın daşıyıcısı olan Yeni Azərbaycan Partiyası da
tarixi baxımdan yaşa dolur, amma mahiyyətcə gəncləşir, sıraları
genişlənir, partiya dövrün siyasi-texnoloji yeniliklərinə açılır,
özünü zaman-zaman inkişaf etdirir.
Bu partiya ənənə və müasirliyin vəhdətidir.
Yeni Azərbaycan Partiyasının müstəqillik tariximizin sabitlik və
inkişaf dövrünün yaradılmasındakı tarixi rolu ilə, bu partiyanın
Azərbaycan siyasi mühitinə gətirdiyi mənəvi dəyərlərlə,
cəmiyyətimizdə siyasi mədəniyyətin, demokratik prinsiplərin, milli
dövlətçilik düşüncəsinin bərqərar olmasında yerinə yetirdiyi
missiya ilə partiyanın hər bir üzvü qürur duya bilər. Partiyamız öz
missiyasını bu gün də şərəflə davam etdirir.
Sıralarında 700 minə yaxın vətəndaşımızı birləşdirən bu partiya,
ilk növbədə, böyük bir dövlətçilik məktəbidir. İnsanlar bu məktəbdə
siyasi bilik və təcrübələrini təkmilləşdirir, öz imkanlarından
vətənin rifahı üçün daha səmərəli və məqsədyönlü şəkildə istifadə
edə bilirlər.
Milli ideyanın formalaşmasında böyük rol oynamış bu partiyanın
Azərbaycan Prezidenti cənab İlham Əliyevin həyata keçirdiyi
modernləşmə xəttinin uğurlarında, ölkəmizin bilik və informasiya
cəmiyyətinə doğru irəliləməsində, yeni düşüncəli vətəndaşların
yetişməsində, beləliklə, Azərbaycanın inkişaf etmiş cəmiyyətlər
səviyyəsinə yüksəlməsində rolu müstəsnadır.
Ölkənin tanınmış ziyalılarının, fikir adamlarının, peşəkar
siyasətçilərin təmsil olunduğu Yeni Azərbaycan Partiyası, eyni
zamanda, cəmiyyətimizdə gedən demokratik inkişaf proseslərini
yönləndirən, bu proseslərin siyasi-ideoloji əsaslarının
formalaşdırılmasında və möhkəmləndirilməsində yaxından iştirak
edən, müstəqillik tariximizi mənəvi töhfələrlə zənginləşdirən
düşüncə mərkəzidir.
Partiyamızın daha bir tarixi rolu isə cəmiyyətdə qadın fəallığı
ənənələrinin formalaşmasına, Azərbaycan qadınlarının ölkənin
ictimai-siyasi həyatında yaxından iştirakına verdiyi töhfələrdir.
Yeni Azərbaycan Partiyasının V qurultayında partiya üzvlərinin
siyasi iradəsi və istəyi ilə Heydər Əliyev Fondunun prezidenti,
UNESCO və ISESCO-nun xoşməramlı səfiri, Milli Məclisin deputatı
Mehriban xanım Əliyevanın partiya sədrinin müavini seçildikdən
sonra partiya daxilində qadın hərəkatı daha da genişlənmişdir.
Azərbaycanda və dünyada həyata keçirilən sosial-humanitar
layihələr, mədəniyyətlərarası dialoq, multikulturalizm, mədəni
dəyərlərimizin qorunması və təbliği, bir sıra möhtəşəm beynəlxalq
tədbirlərin təşkilatçılığı nümunəsi ilə uğur rəmzinə çevrilmiş
Mehriban xanım Əliyeva bu gün sədr müavini kimi YAP-ın inkişafında
da mühüm rol oynamaqdadır.
Bu partiya yüksək təşkilatçılıq, böyük siyasi mədəniyyət
nümunəsidir. Ölkəmizdə müasir dövrün çağırışlarına uyğun partiya
işi təcrübəsinin formalaşmasında, siyasi plüralizm ənənələrinin
möhkəmlənməsində, münaqişələrin diskussiya məcrasına
yönəldilməsində, bütün cəmiyyətlər üçün böyük təhlükə doğuran
qaragüruhçu çarpışmaların öz yerini intellekt mübarizəsinə
verməsində Yeni Azərbaycan Partiyasının böyük xidmətləri var.
Və müstəqillik tariximizdə bu qədər nəcib işlərə imza atmış bir
siyasi partiyanın artıq fəaliyyətinin 24-cü ildönümünü qeyd etməsi
çox fərəhli hadisədir.
***
Bu sətirləri qələmə ala-ala xəyalən Yeni Azərbaycan Partiyasının 24
il ərzində keçib gəldiyi çətin və şərəfli yola nəzər salıram.
Partiyanın milli dövlətçilik tariximizdəki uğur formulunu
müəyyənləşdirməyə çalışıram. Düşünürəm ki, bu formul Azərbaycan
Respublikası Prezidentinin partiyanın roluna qiymətində mükəmməl
şəkildə ifadəsini tapıb:
Mütəşəkkil fəaliyyət, öz liderinə sədaqət və Azərbaycan xalqının bu
siyasətə verdiyi dəstək!
Bu vəhdət Yeni Azərbaycan Partiyasını müstəqil dövlətimizlə birgə
yeni-yeni uğurlara aparacaq!..
Bayramımız mübarək, əziz partiyadaşlarımız!..
Hüseynbala MİRƏLƏMOV,
Milli Məclisin deputatı,YAP Xətai rayon təşkilatının
sədri
-
Kriminal03:30
Sumqayıtda DƏHŞƏT: oğul ata-anasını qətlə yetirdi - YENİLƏNDİ
-
Magazin202:22
Məşhur model çimərlikdə çılpaq pozalar verdi - FOTO
-
Nəqliyyat01:00
ŞOK İDDİA: Dubayda su altında qalan avtomobillər Azərbaycana gətirilə bilər - VİDEO
-
Magazin100:45
“Səhvlərinizin əllərindən öpün”
-
MDB00:30
Azərbaycanlı milyarder Rusiyanın ən zəngin adamı oldu
-
Qoroskop00:15
Günün ULDUZ FALI: münasibətlər gərginləşə bilər
-
MDB18 Aprel 23:12
Bu ölkədə falçı və cadugərlərlə bağlı SƏRT QƏRAR VERİLƏCƏK
-
Magazin118 Aprel 22:48
Məşhur xanəndə ONLARI QINADI: "Bu saat necə gəldi geyinirlər" - FOTO