Nida.az
Vaşinqton-Bakı qarşıdurmasının pərdəarxası: Sekuta hansı tapşırıqla gəlir? – TƏHLİL
Vaşinqton – Bakı münasibətlərində növbəti gərginlik müstəvisi müşahidə olunur.
Bu məsələyə ABŞ-ın fövqəlgüc olaraq istədiyi ölkəyə müdaxilə etmək iqtidarında olması və “güclülər həmişə haqlıdır” prinsipi ilə yanaşanlar da var. Bu yanaşma demokratiya adı altında pərdələnir. Lakin rəsmi Bakı öz haqlı mövqeyi kontekstindən çıxış edir.
Azərbaycan ABŞ-ın əsas enerji tərəfdaşlarından biridir, böyük qonşusu Rusiyanı qarşısına almaq bahasına olsa belə, Qərbin enerji təhlükəsizliyində önəmli yer alır. Bakı beynəlxalq terrorizmə qarşı mübarizədə də həmişə Vaşinqtonun yanında olub. Regionun təhlükəsizliyində mühüm rol alan Azərbaycanın bir sıra digər səbəbləri də var. Lakin ABŞ öz yaxın müttəfiqini sona qədər dəstəkləmir, xüsusilə Dağlıq Qarabağ məsələsində daha çox Ermənistan mövqeyinə yaxın yanaşma ilə çıxış edir. ABŞ-ın Bakıya qarşı qeyri-adekvat yanaşmasını bu ölkənin öz mediası da tənqid edir. Misal üçün, “The Hill” nəşri bu günlərdə Obama administrasiyasını Azərbaycan siyasətinə görə tənqid edib. Nəşr Vaşinqtonun Bakıya aid siyasətini məntiqsiz adlandırıb.
“Obama administrasiyası heç bir məntiqə sığmayan yanaşma
sərgiləyərək İsrailin dostuna üz çevirir. Əslində bəzən ABŞ-ın
dünyadakı maraqlarını müəyyənləşdirmək çətin olur. Bu gün biz Yaxın
Şərq problemi kontekstində bu bölgədə dostlarımızı artırmalıyıq.
Neft hasil edən dost ölkələri daxili və xarici düşmənlərdən
qorumalıyıq. Xüsusilə Rusiya və İrandan fərqli enerji resurslarını
qorumağa məcburuq. Bu baxımdan, İsrailin dostlarına üstünlük
verilməlidir. O cümlədən Azərbaycana. Rusiya rəsmi Bakıya Avrasiya
İttifaqına daxil olması üçün təzyiqlər edir. Bunun fonunda Obama
administrasiyasının Ermənistan-Azərbaycan, Dağlıq Qarabağ
münaqişəsini “dondurulmuş münaqişə” adlandırması Cənubi Qafqazda
Moskvaya meydan verməsi deməkdir”, - deyə “The Hill” yazır.
Göründüyü kimi, Vaşinqton-Bakı qarşıdurması müstəvisində ümumi
olaraq Azərbaycan haqlıdır. Siyasət isə daha çox detallardan doğan
prosesdir. Yəni, iki ölkə arasındakı gərginlik son proseslər
fonunda baş verib. Burda nə hansısa jurnalistin həbsi, nə hansısa
radionun bağlanması səbəbdir.
Azərbaycan Cənubi Qafqazın əsas gücü olaraq, bu bölgə üzərində
savaş aparan ABŞ və Rusiyanın əsas hədəfidir. Biz bu iki cəbhə
arasında məsafə saxlamaqla münasibətləri qorumağa çalışsaq da, daim
iki tərəfdən də təzyiqlərə məruz qalırıq. İstək birdir - mənim
yanımda olmalısan.
Bakı çox yaxşı anlayır ki, tərəzinin hansısa gözünə ağırlıq versə, zərbə ilk olaraq özünə dəyəcək. Rusiyanın yanında olmaq illərdir ölkənin müstəqil siyasətinin əsas dayağı olan enerji siyasətinə böyük zərbədir. Burda ABŞ-ın özünəməxsus formada istifadəyə buraxdığı “Troya atlarının” törədə biləcəyi fəsadları, həmçinin ərazi bütövlüyümüz məsələsinə və suverenliyimizə əlavə təhlükələri də unutmaq lazım deyil.
ABŞ-a üz tutub, Rusiyaya arxa çevirmək isə şimal qonşumuzun kəskin müdaxiləsinə səbəb ola bilər. Ən azından Dağlıq Qarabağ münaqişəsində Ermənistanın mövqeyi daha da möhkəmlənə, eləcə də etnik amillərdən tutmuş, hərbi müdaxilələrə qədər poblemlər yaşana bilər. Uzağa getmək lazım deyil, Gürcüstan və Ermənistan gözümüzün önündə olan bariz nümunədir. Bu baxımdan, rəsmi Bakının apardığı siyasət bəlkə də bu bölgə üçün ən uğurlu siyasətdir. Burda Bakının şəxsi xarakteri də mühüm rol oynayır. Belə ki, 1993-cü ildən bu günə qədər Azərbaycan müstəqil siyasət aparmağa çalışıb və kiminsə boyunduruğunda yaşamaq niyyətini heç vaxt özünə yaxın buraxmayıb. Çətin və ya asan olmasından asılı olmayaraq, bu siyasət uğur qazanıb.
Lakin son proseslər də göstərir ki, nə ABŞ, nə də Rusiya Bakını
buraxmaq niyyətində deyil. Ukrayna hadisələrindən sonra Cənubi
Qafqazda əsas güc olmaq hər iki tərəf üçün bir daha aktuallığını
artırdı. Sirr deyil ki, Bakının tərəf olacağı cəbhə bu bölgədən
qalib çıxacaq. Ən azı iqtisadi baxımdan Azərbaycandan asılı olan
Gürcüstan məcbur şəkildə Bakının tutacağı tərəfdə yer alacaq.
Türkiyənin Bakı və Tiflisi öz ətrafında cəmləmək cəhdləri Qərbin da
hərəkətdə olduğunu göstərir. Lakin Rusiya da sakit dayanmayıb və öz
qəlibinə uyğun siyasətini yürüdür.
Digər tərəfdən, Azərbaycanın öz yaxın qonşusu Rusiyaya bacardığı qədər iqtisadi dəstək verməsi ABŞ-ı qıcıqlandırır. Bakı bunu öz maraqları üçün edir, Vaşinqton isə öz maraqlarına zidd hərəkət kimi qiymətləndirir. Yəni, ABŞ Rusiyaya qarşı hücum kontekstində kiminsə Moskvanın yanında dayanmasını istəmir.
Ötən ilin son ayında iki mühüm hadisə də proseslərə aydınlıq
gətirmək baxımından vacib oldu.
Dekabrın 21-də ABŞ dövlət katibi Con Kerri Azərbaycan Prezidenti İlham Əliyevlə telefon vasitəsilə danışdı. Ardından bir həftə keçmiş dekabrın 28-də Rusiya baş nazirinin müavini Dmitri Roqozin Bakıya səfər etdi. Bu iki hadisə baş verənlərə müəyyən mənada aydınlıq gətirir. Hər iki cəbhə Bakı yolunda “marafona” çıxıb.
Bəzi ekspertlər Bakı-Vaşinqton münasibətlərinin daha da
gərginləşəcəyini düşünür. Lakin burda diqqətdən qaçan daha bir
məqam da var. Belə ki, artıq Qərb siyasi çevrələrində Rusiyadan
fərqli enerji mənbələri ilə işləmək haqda qəti qərar verib.
Avropa Birliyinin energetika nazirlərinin toplantısında Avropa
Komissiyası başaqçısının müavini Maroşem Şefçoviçin sözləri bu
mənada diqqət çəkir.
“Avropa Birliyi “Cənub qaz dəhlizi”nə üstünlük verir. Xəzər
regionunun qaz yanacağının bu qaz kəməri ilə Avropanın enerjisini
təmin etməyə çatacağı güman edilir”, - deyə Şefçoviç bildirib.
Bu mənada əsas enerji mənbəyi olan Azərbaycanla gərgin münasibətlər
ABŞ-ın xeyrinə deyil və güman ki, yaxın müddətdə münasibətlər elə
Ağ Ev tərəfindən yoluna qoyulacaq.
Digər tərəfdən, ABŞ Azərbaycana yeni səfir təyin etdiyi Robert
Sekuta artıq yoldadır və o, yaxın günlərdə Bakıda olacaq. Onun
sələfi Morninqstar kimi enerji mütəxəssisi olması da qeyd olunan
enerji amilini təsdiqləyir.
Milli Məclisin beynəlxalq münasibətlər və parlamentlərarası
əlaqələr komitəsinin üzvü Asim Mollazadə Publika.az-a açıqlamasında
yeni səfirin Bakıya gəlişinin iki ölkə arasındakı çox şaxəli
əməkdaşlığı genişləndirəcəyini bildirib: “ABŞ - Azərbaycan tərəfdaş
ölkələrdir. Bəzi məsələlərə bağlı fikir ayrılığı var. Amma yeni
səfirin Bakıya gəlməsi Azərbaycan-ABŞ münasibətlərinin inkişafına
xidmət edəcək. Bizim ölkələrin çoxşaxəli əməkdaşlığını daha da
genişlənəcək. Yeni səfirin enerji mütəxəssisi olması da
unudulmamalıdır. Çünki ABŞ-la Azərbaycan arasında təhlükəsizlik,
humanitar, mədəniyyət, iqtisadi və digər sahələrdə əməkdaşlıqla
yanaşı, enerji sahəsində də sıx əməkdaşlıq var”.
Millət vəkili iki ölkə arasında gərginliyin yoluna qoyulacağını
düşünür.
Azərbaycan Milli Strateji Təhqiqatlar Mərkəzinin sədri, politoloq
Natiq Miri Publika.az-a açıqlamasında bildirib ki, yeni
səfir Sekuta Bakıya xüsusi tapşırıqla gəlir: “Ümumiyyətlə yeni
səfirin təyinatı gərginləşən Bakı-Vaşinqton münasibətləri
kontekstində ciddi siyasi hadisədir. O ciddi tapşırıqlarla
Azərbaycana gələcək. Bir nömrəli vəzifəsi də əvvəlki isti, səmimi
münasibətlərin yenidən bərpa olunmasıdır”.
Politoloq ABŞ-la münasibətlərin pozulmasının rəsmi Bakının da
maraqlarına uyğun olmadığını bildirib: “ABŞ hegemon dövlət olaraq
bütün bölgələrə təsir etmək imkanına malikdir, o cümlədən bizim
yerləşdiyimiz bölgəyə də. Bu baxımdan, onunla münasibətlərin yaxşı
olması xeyrimizədir. Digər tərəfdən, biz bölgəmizdə Rusiya,
Ermənistan və İran kimi bizim zəifləməyimizi ürəkdən istəyən
qüvvələrin də olduğunu unutmamalıyıq. Ona görə də ABŞ-la
münasibətlərimizi saxlamaq bizə lazımdır”.
N. Miri Vaşinqtonun da Azərbaycan kimi strateji əhəmiyyətə malik
olan ölkə ilə gərgin münasibətlərdə olmaq istəmədiyini deyib.
“Azərbaycan kimi strateji əhəmiyyətə malik dost ölkəni itirmək
ABŞ-ın marağında deyil. Çünki Vaşinqtonun regionda maraqları var,
xüsusilə, enerji məsələləri baxımından. Ona görə də Sekuta Bakıya
xüsusi tapşırıqla gələcək və 2015-ci ilin ABŞ-Azərbaycan
münasibətlərində istiləşmə ili olacağını düşünürəm. Bu hər iki
tərəfin xeyrinədir”, - deyə politoloq bildirib.
Asif Nərimanlı
-
Nəqliyyat19:48
Azərbaycanda bu taksi şirkəti BAĞLANIR - FOTO
-
Sosial19:12
Azərbaycanda tikintidə GÖRÜNMƏMİŞ HADİSƏ - VİDEO
-
Sosial18:40
Xankəndidə dünyaya gələn ilk körpənin ailəsinə MÜJDƏ
-
Sosial17:54
Əli Əsədov qərar imzaladı
-
Qarabağ 17:13
Xankəndidə ilk körpə dünyaya gəldi - FOTO
-
Qarabağ 16:38
Bu ölkələr Ermənistanı bizə qarşı silahlandırır, gözləyə bilmərik
-
Rəsmi xronika16:13
Biz dörd kənd məsələsini heç vaxt yaddan çıxarmamışıq
-
Nida Xəbər 16:08
SON DƏQİQƏ: Qazaxın azad edilən kəndində bayrağımız qaldırıldı - VİDEO