Nida.az

Roma Papası Xocalı soyqırımına münasibət bildirsin!

14 Aprel 2015 15:22

Milli Məclisin bu gün keçirilən iclasında çıxış edən deputat Məlahət İbrahimqızı bəzi təşkilatların qərəzli formada Azərbaycanda korrupsiya olması ilə bağlı yaydığı bəyanatlara münasibət bildirib.

Publika.az-ın məlumatına görə, YAP-çı deputat həmin hesabatlarda Avropa Birliyinə daxil olan ölkələrdə tibbi sığorta sahəsində külli miqdarda korrupsiya faktlarının olmasının öz əksini tapdığını da söyləyib.

M.İbrahimqızı Roma Papasının qondarma erməni soyqırımı ilə bağlı açıqlamasına da etiraz edib: “100 il bundan qabaq arxivin küncündə toz basmış məsələyə diqqət verən Roma Papasının Xocalı soyqırımına münasibət bildirməməsi təəssüf doğurur”.

Millət vəkili Sabir Rüstəmxanlı isə bildirib ki, Azərbaycan bu məsələdə Türkiyənin yanında olduğunu bir daha bəyan etməlidir: “Azərbaycanda soyqırım muzeyi yaradılmalıdır. Həmçinin biz Roma Papasına çıxışına etiraz olaraq məktub göndərməliyik”.

Vasif Həsənli